DILI (timorpost.com) – Prezidente Repúblika (PR), Jose Ramos Horta, enkontru ho Primeiru Ministru (PM), Taur Matan Ruak, hodi husu autorizasaun atu ba partisipa asembleia jerál iha Nova-Iorke.
“Ha’u agradese Primeiru Ministru tanba simu ha’u, tanba ida ne’e ha’u mak husu no oferese an mai iha ne’e hodi ko’alia ho Primeiru Ministru tan de’it bainrua ha’u atu arranka ona ba iha Nova-Iorke, ba Asembleia Jerál,” dehan Xefe Estadu, iha rezidénsia Xefe Governu, Faról, Segunda (19/09).
Nia dehan, hakarak mai rona no husu Primeiru Ministru, kona-ba preokupasaun Governu nian, relasiona ho asuntu ruma, hodi nia ba bele ko’alia.
“Ha’u prepara daudaun lori sira-nia naran atu diskursu, orasida prontu ona ha’u sei haruka fali ba Primeiru Ministru hodi haree, tanba ida ne’e diskursu Estadu, entaun ha’u konsulta ho Primeiru Ministru no Ministra Negósiu Estranjeiru no Kooperasaun,” deklara Horta.
Nia mós subliña, tanba ne’e nia ba sei ko’alia kona-ba asuntu nasionál, hodi halo report ida ba komunidade internasionál sira iha Timor-Leste ne’e pozitivu tebes.
“Iha ha’u-nia draft ha’u hakerek tiha ona maneira Povu Timor-Leste enfrenta ho efikásia no Covid-19 ne’ebé Timor-Leste konsege kontrola no halo jestaun di’ak, maski nasaun barak lakon nia ema barak, no sei ko’alia ita-nia preparasaun atu tama ASEAN,” hateten nia.
Nia reforsa, tanba ne’e ohin Primeiru fó liberdade tomak ba nia hodi ba Nova-Iorke hodi ko’alia, tanba nia ba sei ko’alia lori Estadu Timor-Leste nia naran.
“Entaun ha’u-nia diskursu iha Nova-Iorke ne’e kuaze relatóriu ida Timor-Leste nia ba komunidade internasionál no progresu ne’ebé Timor-Leste halo iha Paz seguransa rai laran no iha polítika toleránsia rekonsiliasaun Timor-Leste nian,” Horta konfesa.
Nia mós sei ko’alia Timor-Leste hanesan nasaun segundu iha mundu maioria Katólika, no minoria Protestante no Islam, maibé nunka iha konflitu no rasista ba relijiaun hanesan ho nasaun sira seluk.
1,968 total views, 3 views today
