DILI (timorpost.com) – Xefe Suku Kaikoli, Hipolito Marques Sarmento, hatete semana oin Tersa (06/12), Suku Kaikoli hahú ona simu osan subsídiu fim do ano ho montante 200 USD.
“Relasiona ho osan fim do ano ne’e, ha’u horisehik simu ona orientasaun husi Ministériu relevante inklui Prezidente Autoridade hato’o mai Administradór do Postu, fó ona data fiksu ba ha’u, Suku Kaikoli sei simu osan iha dia 06 de Dezembru,” nia hateten ba Média Online Timor Post iha nia knaar fatin sede Suku Kaikoli, Sábadu (03/12).
Nia dehan, xefe da família iha Suku Kaikoli, hamutuk 1161 mak iha direitu atu simu subsídiu 200 USD, maibé sira-nia parte identifika ona iha komunidade balun atu la bele simu subsídiu ne’e, tanba komunidade balun rendimentu liuhusi 500 USD.
“Ami identifika ona ema 100 ital, mak sei la simu subsídiu 200 USD, maibé ida ne’e tuir ida-idak nia konxiénsia, maibé ha’u hanesan autoridade ha’u la taka dalan ba se de’it, hakarak simu osan ne’e, tanba ami bazeia ba formuláriu husi Ministériu Estatál no Solidariedade Inkluzaun, hafoin prienxe formuláriu mak bele foti osan, maski ha’u hanesan xefe suku ho xefe aldeia mak asina, maibé aban sira deteta nain mak ba hatán,” nia dehan.
Nia hatete, iha loron 06 fulan Dezembru tinan 2022, Suku Kaikoli hahú simu subsídiu 200 USD, maibé hahú aldeia ida, hafoin aldeia ida remata mak ba fali iha aldeia seluk.
“Ami iha aldeia iha lima, 01 sentru da Unidade, 02, 03 Sakoko, 04 foto rai boot no 05 tahu laran, maibé entre aldeia mak sei simu uluk subsídiu 200 USD, hafoin mak ba fali aldeia seluk,” nia informa.
Alende ne’e nia dehan, sira-nia parte identifika hotu komunidade sira iha suku Kaikoli, maibé iha lei Artigu 37/2022, hatete saláriu, la’ós rendimentu, mais nia hanesan xefe Suku Kaikoli ba tuir enkotru ho Ministeriu relevante ho orientasaun katak rendimentu, la’ós saláriu.
“Ita-nia Prezidente Repúblika, José Ramos Horta, promulga Lei ne’e ba saláriu, maibé agora ami ba tuir fali enkontru ikus mai katak bazeia ba rendimentu ho saláriu, se saláriu Estadu fó no rendimentu husi seluk-seluk tan, mak konta ho saláriu mak liu 500 USD la bele simu osan refere,” nia preokupa.
Nia dehan, nia parte hanesan Xefe Suku Kaikoli, hakarak hatete, ema barak mak hakarak simu subsídiu 200 USD ne’e, maibé iha lei bandu FALINTIL-Forsa Defeza Timor-Leste (F-FDTL) ho Polisia Nasionál Timor-Leste (PNTL) no funsionáriu bazeia ba saláriu ho rendimentu, maibé sira hatete balun hakarak simu, tanba razaun sira-nia naran aprovadu.
“Maibé, ida ne’e konsekuensia ema ida-idak nian, mais se nia mak hakarak simu, ha’u hanoin nia responde ami la taka dalan no sei selu tuir orientasaun ho formuláriu ne’ebé ami prepara ona husi Ministériu relevante, se mak hakarak simu ami haruka enxe formuláriu, depois asinadu husi Xefe Suku no Xefe Aldeia prontu nia simu osan, maibé aban-bainrua bolu nia mak ba hatán, ne’e ami simu orientasaun husi Ministeriu relevante,” nia dehan.
594 total views, 6 views today
