DILI, (timorpost.com)— Governu Xina liuhosi embaixada iha Timor-Leste apoiu motorizada Batadór 5 ba Polísia Tránzitu Nasionál hodi asegura alta entidade nasionál no vizita husi alta entidade internasionál.
Komandante Polísia Tránzitu Nasionál, Superientidnte Asistente, Luis Costa, hatete “Ohin embaixada Xina entrega motorizada Batadór ho total lima ba polísia tránzitu nasionál hodi nune’e asegura alta entidade nasionál no internasionál banhira mai iha Timor-Leste”, dehan, Luis Costa, ba jornalista sira iha edifísiu tránzitu nasionál, Kaikoli, Segunda, (26/02).
Nia esplika, prosesu hetan apoiu husi embaixada Xina ne’e, tanba uluk Segundu Komandante Jerál PNTL, Pedro Belo, sei iha Komandante Komandu Operasaun Nasionál iha tinan 2022 mak halo proposta ka pedidu ba iha embaixada Xina, husu apoiu motorizada batadór ba polísia tránzitu nasionál.
“Iha altura ne’eba Segundu Komandante Jerál PNTL halo pedidu ba embaixada Xina tanba iha altura ne’eba ita-nia forsa Polísia Militár hetan mós apoiu husi embaixada kona-ba motorizada batadór, tanba ne’e mak eselénsia Segundu Komandante Jerál ho hanoin ida oinsá mak bele halo mós proposta pedidu ba iha embaixada Xina atu bele apoiu mós batadór, liuliu motorizada ba iha Polísia Nasionál Timor-Leste, liuliu polísia tránzitu nasionál oinsá bele utiliza no lori fó apoiu seguransa ba iha ita-nia alta entidade husi estranjéiru no mós ita-nia alta entidade órgaun haat ne’e”, nia esplika.
Nia hatutan “Ita hotu hatene katak ita motorizada batadór 5 ne’ebe hetan estragus banhira iha inundasaun iha tinan hirak liubá, ho ida-ne’e ita hetan problema kona-ba batadór, liuliu atu bele halo servisu ba entidade alta nasionál no internasional, maibé ho apoiu ida-ne’e ami fiar katak Polísia Nasionál Timor-Leste, liuliu polísia tránzitu atu bele servisu di’ak liután husi apoiu sira ne’ebé fó ba ami”.
Komandante Tránzitu Nasionál ne’e informa, liga ba asegura vizita Amu Papa Francisco nian mai Timor-Leste, ne’e depende ba kompeténsia ne’ebé atribui husi komisaun preparasaun tanba maske vizita alta entidade ne’e servisu polisia tránzitu nian maibé depende ba iha atribuisaun kompeténsia husi komisaun.
Ho apoiu ne’e, PNTL liuhosi polísia tránzitu sente kontente no agradese ba Governu Xina liuhosi embaixada Xina ne’ebé apoiu ona polísia tránzitu.(*)
3,996 total views, 3 views today
Bele hare Video Seluk :
Subscribe to Timorpost
