Timor Post (25/11/2020)—Prezidente Repúblika Francisco Guterres Lú Olo sei halo esforsu atu hametin liután kooperasaun bilateral entre Timor-Leste ho Brazil.
Iha audiénsia despedida ho Embaixadór Brazil ba Timor-Leste Aldemo Garcia, Prezidente Repúblika apresia servisu reprezentante diplomátika iha Timor-Leste no sei halo esforsu atu hametin liután relasaun entre nasaun rua.
Ba Timor Post, komunikadu ba imprensa husi Palásiu Prezidensiál, Prezidente Repúblika hatete, Brazil hatudu tiha ona nia esperiénsia iha área agrikultura oinsá sai husi nasaun importadór ai-han transforma-an sai esportadór ai-han ba mundu. Esperiénsia Brazil nian iha área agrikultura sei utíl tebetebes ba Timor-Leste atu aprende.
Timor-Leste iha dezafiu boot ho seguransa alimentar tanba ne’e presiza tebes iha investimentu iha área agrikultura. Brazil bele fahe ninian esperiénsia kona-ba hakat liu dependénsia alimentasaun husi nasaun seluk.
Kooperasaun bilateral foun sei konsentra iha setór agrikultura oinsá bele hamenus dependénsia ba hahan importasaun ho baze familiar, serbisu ho Comissão Anti Corrupção, programa maestrado iha àrea edukasaun iha Universidade Nasional Timor-Leste no portugés iha funsaun públika.
Embaixadór Aldemo Garcia hateten katak Governu Brazil nia apoiu ba dezenvolvimentu la’ós fó osan maibé liuhusi fornese expertise iha área oioin depende ba nesesidade Timor-Leste ninian.
Reprezentante Diplomátika ne’e fiar katak Timor-Leste sei ultrapasa nia dezafiu demokrasia no fiar iha ninia lideransa atu lori Timor-Leste ba oin.
Embaixadór Brazil hafoin tinan-haat hala’o nia misaun iha Timor-Leste hetan knaar foun nu’udar konsul jerál hodi tau matan ba komunidade Brazileiru liu 200 mil iha Japaun. (*/lyl)
829 total views, 3 views today
Oinsa Ita nia Reaksaun iha Notisia Nee?
You have reacted on “Lú Olo: Esperiénsia Brazil iha Área Agrikultura…”
Bele hare Video Seluk :
Subscribe to Timorpost
