DILI (timorpost.com) – Polisia Nasionál Timor-Leste (PNTL) liuhosi Unidade Polisia Maritima (UPM) realiza serimónia aniversáriu ba dala-20 iha instalasaun Kuartél Unidade Polísia Maritima Sional Dili.
“Ita kontinua sai sasin ba ezisténsia husi Unidade Polisía Marítima, ne’ebé ita bele kompara hanesan labarik ida karik nia hahú joven daudauk no tasak ba daudauk ona iha mentalidade no kapasidade em termos intelektualidade no mós profisionalizmu nian. Ho natureza militár no karater espesiál ita boot sira iha papél importante tebes hodi tau matan ba ita nia tasi ne’ebé ho luan 84,02% husi rai maran inklui riku soin oi-oin iha ita nia tasi,” Vise Ministru Interior, Antonio Armindo, haktuir liuhosi ninia diskursu iha ámbitu parada, Sábadu (27/05).
Nia dehan, mezmu UPM hasoru difikuldade oi-oin iha parte ekipamentu apoiu no limitasaun ba lancha no mós ró boot hodi halo patrulhamentu rutina, maibé UPM kontinua hatudu vontade servisu hodi serve ita nia tasi ho di’ak.
“Governu liuhusi Ministériu Interior durante ne’e halo mós esforsu lubuk ida hodi apoiu Unidade ida ne’e, hanesan kontinua tau prioridade halo manutensaun ba ró UPM nian no mós ró Kayrala hodi kontinua halo operasaun, formasaun baze hodi forma ema sai profisionál, kria postu seguransa no postu vijilánsia ne’ebé hetan apoia hosi Governu Australia liuhosi TLPDP (Timor-Leste Program Development Police)”, nia relata.
“Ita espera katak governu foun mai sei bele kontinua tau atensaun liután liuhusi sosa ró patrula ne’ebé adekuadu hodi bele uza ba halo operasaun no kontrolu ba ita nia tasi ho másimu, liuliu iha parte kosta súl ne’ebé riku tebes ho ikan no riku soin seluk ne’ebé durante ne’e ita menus halo kontrolu hodi fó biban akontese peska ilegál. Situasaun ida ne’e akontese tanba limitasaun ekipamentu suporta ne’ebé ita nia unidade ida nee hasoru, no espera sei rezolve iha governu foun ne’ebé sei mai”, nia subliña.
Governante ne’e hatutan, tuir dadus husi Ministériu Agrikultura no Peskas, husi tinan 2018-2020 ita nia nasaun lakon osan 11,728,470.00 USD iha de’it tinan 3 nia laran tanba movimentasaun ró ilegais hamutuk 224 ne’ebé halo peska ilegál hodi na’ok ita nia ikan purvolta 288,998 toneladas husi ita nia tasi.
“Iha imi nia loron aniversáriu ida ne’e, ha’u lori Primeiru Ministru no Ministru Interior nia naran hakarak parabeniza ita boot sira hotu ba imi nia servisu no dedikasaun tomak ne’ebé imi hatudu ona durante ne’e. Ha’u fiar katak unidade ida nee sei sai di’ak liután husi tempu ba tempu no sai solidu liután hodi asegura seguransa ita nia maritima no mós fó liberdade ba ita nia peskadór sira hodi halo atividade iha tasi laran inklui movimentasaun tomak iha ita nia tasi leten. Parabéns no susesu liután ba Unidade Polisia Maritima”, nia dehan.
Entretantu, Komandante Jerál PNTL, Komisáriu Jerál Polisia, Henrique da Costa hateten, UPM iha assume papél importante hodi salva guarda vida umana tantu iha maritimas no mós rai maran.
“Komandu Jerál iha ona polítika nasionál hodi koloka tasi hanesan elementu sentrál ida hodi salva-guarda vida umana iha tasi no salvamentu maritima nian. Tanba ne’e UPM assume papél sentrál ida hodi hasae volume patrulamentu maritima no aumenta fiskalizasaun ba peska ilegál sira, tráfiku de seres humanu, tráfiku droga, tráfiku armas no kombate krime transnasional”, Henrique hateten.
Henrique dehan, durante halo patrulla UPM konsege halo ona prevensaun hodi hapara atividade ilegál sira prinsipalmente iha pratika krime kontrabandu no apreensaun ba produtu sira hanesan tabaku, kombustivel, fugetes liuhosi tasi.
“UPM iha atu garante la’ós de’it iha misaun seguransa interna maibé mós iha kontestu luan liu kona-ba seguransa nasionál, tanba ne’e iha nesesidade ida importante tebes hodi halo investimentu ida boot iha area espesiál ida ne’e relasiona ho aumenta rekursu umanu, ró ahi ho nia ekipamentu sira no mós formasaun ida ne’ebé bele responde ba nesesidade tuir era globalizasaun ohin loron nian”, nia hatutan.
Lider másimu PNTL ne’e hatutan, isu sira mai husi nasionál, regional no global ne’ebé ezije presiza iha kapasitasaun ba UPM maka hanesan, Seguransa portuaria no seguransa ba rotas komersiais, obrigasaun hodi kumpre konvensoens maritimas internasionais hodi bele permite ita atu adere ba ASEAN sira hodi kombate efetivamente krime sira iha nivel lokál no transnasional. Peska ilegál ne’ebé laiha regulamentu ida iha tasi Timor-Leste nian no bele identifika hanesan problema ida grave e sériu.
“Tempu badak Komandu sei nomeia ofisiais superiores subalternos sira atu prienxe kargu ba Komandu no Xefia, ne’ebé iha hela prosesu atu nune’e sira bele prepara ba aposentasaun. Komandu sei lakon ofisiais, sarjentos no ajentes di’ak sira maibé tanba lei haruka entaun ita hotu tenke kumpre”, nia hakotu.
Entretantu, partisipante iha serimónia ne’e Segundu Komandante Jerál PNTL, Komisáriu Polisia, Pedro Belo, Komandante Komandu Operasaun, Superintendente Xefe Jose Soares, Komandante PNTL Munisípiu Dili, Superintendente Xefe Natércia Martins, Komandante UEP, Superintendente Xefe Orlando Gomes, Embaixadór Japaun mai Timor-Leste, Tetsuya KIMURA, reprezentante sira husi korpu diplomátiku Embaixada Xina, reprezentante sira husi komponente militár no polísia internasionál sira, parseria dezenvolvimentu husi TAF (The Asia Foundation) no TLPDP (Timor-Leste Program Development Police) no mós entidade sivíl sira.
1,096 total views, 15 views today
Bele hare Video Seluk :
Subscribe to Timorpost
