DILI (Timor Post) – Primeiru Ministru (PM), Taur Matan Ruak, deside halo kansela ba rekrutamentu membru foun Polisia Nasionál Timor-Leste (PNTL).
“Rekrutamentu PNTL ha’u kansela, tanba dezenvolvementu institutusaun hotu-hotu, inklui PNTL tenke tau matan mós ba ita-nia ekonómia. Se hahan uituan ita hatama ema barak, kualidade laiha, hahán la to’o, ne’e ita problema,” nia relata iha Palásiu Prezidensiál, Bairru-Pité, Kinta (11/08).
Nia dehan, bainhira nia Jenerál, tuir nia planu mak F-FDTL só iha tinan 20 liu mak foin atinji rihun 3, no ida ne’e hatudu duni, tanba husi 2001 to’o 2022, ne’e sira foin mak atinji númeru 2600, no PNTL rasik sa’e tiha 4000.
“Osan hakarak aumenta, hahán mós hakarak aumenta, ne’ebé sira de’it ka? Ba ki’ik sira iha foho ne’e, ita halo nusa, entaun la rekruta,” nia dehan.
Nia haktuir, rekrutamentu ba PNTL ho Forsa ne’e tenke haree mós ba amesas no risku, labele hatama ema, hatama ema, depois ba han de’it, ejize saláriu de’it depois tur de’it kajerna ida ne’e labele, tenke servisu.
“Ha’u dehan ba sira bainhira ha’u mak Ministru Interiór no Primeiru Ministru, PNTL ninia rekrutamentu laiha, izola ida ne’e no ha’u-nia prióridade mak sira ne’ebé atinji ona tinan 60 tenke ba deskansa, nune’e tenke altera lei para sira idade 60 ba deskansa, hodi joven sira avansa, se lae katuas ona la’o hotu labele, no hanoin mós la la’o, maibé nafatin de’it, enkuantu ba joven sira fatin laiha,” nia relata.
3,099 total views, 6 views today
Bele hare Video Seluk :