DILI—Konfirmadu Eis Prezidente Autoridade (PA) Rejiaun Autónomu Espesiál Ambeno Oekusi (RAEOA) no Zona Espesiál Ekonomia sosiál Merkadu (ZEESM), José Luis Guterres la partisipa iha serimónia tomada de posse Arsenio Paixão Bano ba pozisaun ne’e husi Primeiru Ministru Taur Matan Ruak.
Tuir ajenda, serimónia tomada de posse hala’o iha loron Sesta (12/06/2020), óras 11:00, iha Palásiu Governu Dili.
Fonte kredivel haktuir, Palásiu Governu manda konvite ba bainaka espesiál ne’ebé atu partisipa iha serimónia ne’e inklui Eis PA Marí Bim Amude Alkatiri no José Luis Guterres, maibé konfirmadu katak reprejentante gabinete atuál RAEOA-ZEESM mak sei hola parte de’it.
Fonte dehan, hafoin Arsenio simu ona posse maka José Luis Guterres sei entrega relatóriu offisial durante fulan-7 nian ba PA foun.
José Luis Guterres simu posse husi Primeiru Ministru Taur Matan Ruak iha loron 15/11/2019 hodi troka Marí Bim Amude Alkatiri. Seidauk kompleta mandatu ba tinan lima, iha loron 10/06/2020 Taur Matan Ruak liuhusi Konsellu Ministru ezonera fundador Partidu Frenti Mudansa ne’e.
Hafoin desizaun Konsellu Ministru ba ezonerasaun, José Luis Guterres hatete, pesoalmetne nia lamenta tebes maibé simu desizaun ne’e. No hato’o mensajen úniku ba Prezidente RAEOA foun Arsenio Bano. “Sussesu ba Prezidente Autoridade (PA) foun. Importante liu maka povu Oekusi Ambeno nia moris i estabilidade,” José Luis subliña.
Durante fulan hitu lidera RAEOA-ZEESM, José Luis konsege hala’o sevisu lubuk ba povu Oekusi liuliu hahú fo konfiansa ba povu, halakon diskriminasaun, kór polítiku iha rai ketan ne’e, no prepara ba halais liu tan dezenvolvimentu ekonomia.
Mudansa ba estrutura iha RAEOA, intensaun hahú kedas iha kampaña eleitorál no Primeiru Ministru Taur Matan Ruak rasik iha momentu ne’eba iha kampaña AMP (Aliansa Mudansa ba Progresu) kompostu husi CNRT, PLP ho KHUNTO deklara, bainhira kaer ukun hasai Alkatiri ho Arsenio husi RAEOA.
Deklarasaun ne’e sai realidade, hodi hili José Luis ho nia ekipa ba troka Alkatiri no Arsenio Bano. Maibé la to’o tinan ida, marka hikas istória liuhusi proposta Taur Matan Ruak rasik nomea hikas Arsenio Bano ba troka José Luis Guterres, hafoin koligasaun AMP lideradu Xanana Gusmão naksobu iha dalan klaran.
Liuhusi Konsellu Ministru iha loron 10/06/2020, ofisialmente ezonera ona José Luis Guterres no foti fali Arsenio Paixão Bano ba lidera Rejiaun Autónomu Espesial Oekusi Ambeno (RAEOA).
Minsitru Prezidénsia Konsellu Ministru, Fidelis Leita Magalhães informa, konsellu ministru lako’alia kona-ba motivu saida mak ezenora José Luis Guterres maibé tuir de’it desizaun konsellu ministru.
“Ami la ko’alia kona-ba motivu polítiku maibé ami ko’alia de’it kona-ba desizaun konsellu ministru. Nebe, ida ne’e mak ohin desizaun hosi konsellu ministru,” Fidelis hatete ba Jornalista sira hafoin Konsellu Ministru iha Palásiu Governu, Dili. (cao)
1,254 total views, 3 views today
Bele hare Video Seluk :