(Reportajen Jose Mauno/Editor Mateus da Cruz)
OE-KUSE – Impaktu hosi udan no anin boot horisehik halo Ró Berlin Ramelau, ne’ebé halo viajen hosi Dili ba Rejiaun Administrativu Espesial Oe-Kuse Ambenu (RAEOA), soke portu Iwao Kitahara, iha asidente ne’e rezulta estragu kaman iha Ró nia bodi.
Tuir informasaun ne’ebé Timor Post asesu husi pasajeiru sira katak, bainhira atu atraka ba Portu Mahata, maibé tanba anin no laloran boot impaktu hosi udan, halo ró Berlin Ramelau soke portu rezulta kuak iha nia sorin no halo pasajeiru ba trauma. Maibé ró konsege atraka iha tuku 8 : 00 kalan.
Operasaun Ró Berlin Ramelau sai husi portu Dili Domingu tuku 8 : 00 dadeer no to’o Portu Iwao Kitahara Mahata Oe-kuse maizumenus tuku 7 : 00 lorokraik. Ró Berlin Ramelau domingu ne’e lori pasajeiru kuaze 600 resin tanba ligadu ho votasaun eleisaun prezidensiál segundu volta.
Reprezentante Oe-kuse oan, atuál deputada bankada CNRT, Lusia Taeki, hatete, ho asidente Ró Berlin nian ne’e governu presiza fó atensaun didi’ak liu liu ba parte Nakoda Ró nian.
“Ha’u ko’alia fila fila ba nakoda, ita kontente tanba ema Timoroan maibé ita mós labele garante liu para nia mesak hodi husi Dili mai Oe-Kuse. Ita tenke iha nakoda ne’ebé esperiensia ona atu akompana liuliu nakoda sira iha Nakroma”, nia hateten ba jornalista sira iha portu Iwa Kitahara Mahata, Oe-Kuse, segunda (18/04).
Nia hatutan, ró Nakroma agora para hela governu bele ko’alia ho nakoda Nakroma nian para akompana nakoda Timoroan iha ró Berlin Ramelau atu hatene klean situasaun tasi laran ba mai Dili-Oe-Kuse.
“Ita hatene horikalan hasoru anin boot, kuandu hanesan ne’e nia tama kedas ba portu ka para lai iha tasi laran depois mak buka fatin di’ak atu atraka”, nia dehan.
Deputada Taeki sujere, governu sentral no autoridade RAEOA tenke tau atensaun hodi atende Oe-Kuse oan fila fali ba Dili depois eleisaun tanba ida ne’e risku ba ema nia vida.
Iha fatin hanesan, Regio da Cruz Salu, intelektual Oe-Kuse oan, hatete akontesimentu ne’e fó mensajen ba governu liuliu autoridade RAEOA katak servisu lubuk ida presiza atu hadi’a tantu husi operador tripulante no mós jestaun ba portu.
“Ha’u hanoin tempu badak governu tenke melora ró ne’e tanba akontese estragu, fó nafatin kapasitasaun ba nakoda atu determina no domina loos pozisaun korente no enbarkamentu iha portu”, nia hatete.
Tuir nia, nakoda sira tenke hetan nafatin formasaun beibeik atu nune’e labele akontese tan hanesan ne’e.
“Ita atu akontesimentu horisehik ne’e sala husi ema maibé tenke haree mós husi parte seluk hanesan portu presiza mellora di’ak liután no Ita haree katak medida ró Berlin Ramelau okupa tomak portu, ne’e foin ró ida ho medida boot. Kuandu aban bainrua ró barak”, nia hatete.(Lee Notisia Seluk Iha Jornal Timor Post/ Asesu You Tube Timor Post)
1,090 total views, 3 views today
Bele hare Video Seluk :
Subscribe to Timorpost
