Timor Post (07/06/2020)—Estudante ida ho naran kompletu Agostinho Salsiha Sarmento, moris iha loron 24 Agostu 2003 iha Suku Aitutu, Postu Administrativu Maubisse, Munisípiu Ainaro, mout iha bee lihun boot ho naran Welenas iha Suku Fatukahi, Postu Administrativu Fatuberlihu, Munisípiu Manufahi.
Akontesimentu ne’e mosu iha loron Sábadu (06/06/2020), bainhira matebian ho nia kolega ida sai husi matebian nia uma atu ba família ida iha mota sorin kuaze kilomentru rua. Sira na’in-rua tuir dalan, liuhusi bee lihun boot (Welenas) ne’ebé lokaliza iha Aldeia Kledik, no sira kombina malu tanba hakarak haris. Nune’e, sira hahú tama ba bee laran, la liu minutu hira maibé nia kolega haree ba matebian hanesan nani la hatene i tanba bee nalihun ne’e naruk, ikus mai matebian mout tún ba bee okos.
Xefe Suku Fatukahi, Moises Acasio da Costa Pinto alias Laba-Laba ba Timor Post via telefone haktuir, bainhira matebian mout, nia kolega ne’e pániku no hakilar hodi komunidade sira tent aba salva maibé la konsege.
“Ami lahatene matebian nani bee hatene ka lahtene maibé tuir sasin labarik ne’ebé hamutuk ho matebian ne’e haktuir katak sira tuir ba bee refere matebian namlele tiha ona iha bee leten maske koko lolo ain atu hodi salva maibé la konsege tanba mout tiha ba okos,” Xefe Suku haktuir.
Xefe Suku haktuir, matebian nu’udar estudante iha Eskola Sekundáriu Saun Francisco Assisi Fatuberlihu, klase 3.
Família sira hato’o ona informasaun ba autoridade suku no polísia hodi halo investigasaun ba akontesimentu ne’e. (lcl)
1,265 total views, 3 views today
Bele hare Video Seluk :
Subscribe to Timorpost
