DILI (timorpost.com) – Relasiona ho publikasaun iha media Sosiál, katak Padre José António mate ona, maibé tuir Xefe Departamentu Kuidadu Intensivu ho ICU, Vidal de Jesus Lopes, informa daudaun ne’e Padre José Antonio da Costa, ho kondisaun grave iha sala ICU Hospital Nasionál Guido Valadares (HNGV).
Nia hatete, informasaun ne’ebé espalla iha media sosiál katak padre José Antonio da Costa mate ne’e, la loos, informa ba públiku no ema sira ne’ebé laiha responsabilidade, fonte la kredivel.
“Ita husu ba públiku, husu ba komunidade, sosiedade no sarani sira tomak, atu la bele fiar informasaun ida ne’e, ita-nia Amu José Antonio da Costa sei moris no baixa hela iha ICU, maibé nia iha faze krítiku, ita-nia amu seidauk mate,” dehan Vidal iha knaar fatin HNGV, Tersa (27/12).
Nia dehan, padre José Antonio da Costa, tama Ospitál iha loron 23 fulan Dezembru tinan ne’e, bazeia informasaun husi família katak, semana ida iha uma la han no la hemu no padre ne’e to’o iha Emerjénsia ho kondisaun koma.
“Husi ne’ebá, mak ita-nia médiku sira halo intervensaun no agora iha ona ICU iha faze krítiku, signifika apoiu ho ventiladór hodi dada iis,” nia hateten.
Xefe Vidal, haktuir Padre José António da Costa, antes ne’e moras hanesan ran midar no tensaun.
“Daudaun ne’e nia ho kondisaun grave, tanba ne’e ami mantein nafatin ho ai-moruk no Posibilidade rekursu ne’ebé iha ami fó di’ak ba nia, mais loron rua ami halo avaliasaun katak, resposta husi nia isin, durante ami halo tratamentu ne’e ladún di’ak, signifika nia faze krítiku,” nia konta.
Nia dehan, Padre José António da Costa ho kondisaun grave, tanba ne’e sira-nia parte atu salva padre Antonio ho porsentu ki’ik.
“Onestu, ami tenke públika ba sarani hotu atu hatene situasaun kona-ba padre José António da Costa, nia kondisaun,” nia informa.
Alende ne’e nia dehan, Padre José António da Costa, atu transferénsia ba rai li’ur ne’e, primeiru sira-nia parte haree ba iha padre nia kondisaun ho idade, tanba daudaun ne’e Padre José Antonio da Costa ho idade 82, nune’e mós atu transferénsia ba rai li’ur ne’e iha prosedimentu lubuk ida.
“Padre José Antonio, daudaun ne’e kondisaun grave no koma hela, tanba ne’e ita la bele halo transferénsia ba rai li’ur,” nia hakotu.
2,126 total views, 3 views today
Bele hare Video Seluk :
Subscribe to Timorpost
