DILI (timorpsot.com) – Klínika Santo Antonio Motaél (KSAM), iha fulan Agostu halo tratamentu ba prizoneiru hamutuk nain-469 iha Prizaun Bekora konsege deteta ema nain-25 mak hetan moras Tuberkuloze.
Tuir Manajer Programa TBC klínika Santo Antonio Motaél, Ambrozio Soares Trindade, hatete momentu iha fulan Agostu ne’e parte Klínika Santo Antonio Motaél nia planu, hodi ba tratamentu ba prizoneiru sira iha prizaun Bekora.
“Ami-nia ekipa mak ba halo tramentu ba prozoneiru hamutuk 469 ne’e, mak konsege deteta prizoneiru nain-25 mak hetan moras Tuberkuloze,” nia hateten ba Timor Post Online iha nia knaar fatin Motaél, Sábadu (10/09).
Nia dehan, banhira sira-nia parte deteta moras tuberkuloze, sira parte halo kedas tratamentu hodi fó ai-moruk sira, nune’e mós parte Klínika Santo Antonio Motaél mós haruka kedas ai-moruk ba iha Klínika Prizasaun Bekora, hodi loron-loron hemu.
“Ami deteta ona ema Nain-25, tanba ne’e banhira ai-moruk laiha, parte Klínika Prizaun Bekora konfirma mai iha ami, depois ami haruka ai-moruk ba,” nia dehan.
Nia hatutan, prizoneiru moras Tuberkuloze ne’e nain-25 kedas, tuir loloos ne’e la bele tau hamutuk iha bloku ida tanba moras ne’e adat liuhusi ko’alia ho kaben tasak.
“Tuir loloos prizoneiru sira ne’ebé atu tama iha prizaun bekora ne’e, halo tiha teste saúde hafoin hatama ba bloku laran, tanba daudaun ne’e sira deteta moras tuberkuloze hamutuk nain-25, kuandu tau hamutuk iha fatin ida de’it, sira sei hetan moras tuberkuloze,” nia hakotu.
Alende nia hatete, sira parte la’ós deteta moras Tuberkuloze de’it, maibé iha mós moras hanesan Mear, isin Manas, kabun moras, maibé ida ne’e sira fó kedas ai-moruk.
Nune’e mós antes ne’e, Diretór Estabelesimentu Prizaun Bekora, João Domingos, hatete iha fulan Agostu ne’e Klínika Santo Antonio Motaél, mai halo tratamentu ba prizoneiru sira.
“Momentu sira mai halo tratamentu ba ita-nia prizoneiru sira konsege deteta moras lubuk ida, maibé momentu ne’ebá sira kedas tratamentu hodi ai-moruk ba ita-nia prizoneiru,” nia hateten iha Prizaun Bekora, Sábadu (03/09).
Nia dehan, bainhira sira halo tratamentu mak hetan moras ruma sira fó Ai-moruk, enkuantu moras grave sira halo transferénsia ba iha Hospital Nasionál Guido Valadares (HNGV) hodi halo tratamentu.
Enkuantu sira deteta moras ruma mak ai-moruk la iha sira parte sei hatuka mai iha klinika Prizaun Bekora, atu nunee bele fo sira hemu.
“Klinika Santo Antonio Motael mai halo tratamentu ba ita nian prizoneiru sira nee, gratuitamente, hodi fo tramentu ba sira,” nia hakotu.
1,372 total views, 3 views today
