DILI, (timorpost.com)— Selebrasaun Aniversáriu Polísia Nasionál Timor-Leste (PNTL) ba dala-24, Prezidente Repúblika, José Ramos Horta, husu PNTL servisu ho profesionál no reziliénte.
“Parabéns ba imi hotu ne’ebé ohin selebra aniversáriu ba dala-24 ho lema ne’ebé importante tebes katak halo servisu ne’ebé profesionál mp reziliénsia, hamriik ho nia ain rasik, tempu ruma bele monu maibé bele hamriik fila-fali”, PR Horta, hatete iha nia diskursu iha ámbitu selebrasaun aniversáriu PNTL ba dala-24 iha UEP Bairru-Pité, Kuarta, (27/03).
Xefe Estadu mós agradese ba parseiru internasionál sira hanesan Austrália, Xina, Korea dos Sul, Indonézia, Japaun, Portugál, Reinu Unidu, no seluk tan ne’ebé hamutuk ho Timor-Leste tinan 20 nia-laran.
“Ha’u hato’o apresiasaun ba parséiru internasionál sira-nia apoiu esensiál ba dezenvolvimentu kapasidade Polísia Nasionál Timor-Leste nian. Hahú husi restaurasaun independénsia, parséiru sira hala’o ona papél importante ida iha formasaun ba ajente sira, fornese ekipamentu no fahe koñesimentu ne’ebé hametin polísia, hodi Kontribui ba seguransa no estabilidade”, dehan nia.
Prezidente Repúblika agradese mós ba ajénsia Nasoens Unidas no nasaun amijável sira, Austrália, Xina, Korea do Sul, Estadus Unidus Amerika, Indonézia, Japaun, Malázia, Nova Zelándia, Portugál no Reinu Unidu ne’ebé sai ona parséiru durante prosesu PNTL.
“Ho ita-boot sira-nia kontribuisaun ne’ebé laran-luak ami hein katak PNTL profisionál liu”, nia afirma.
Agradese mós ba apoiu ne’ebé fornese husi Timor-Leste Police Development Program (TLPDP) ne’ebé finansia husi Polísia Federál Australia iha tinan hirak foin lalais ne’ee. TLPDP sai ona parséiru importante ida iha asisténsia estratéjika no orsamentál apoiu tékniku no programa formasaun ba unidade servisu no departamentu oioin.
Agradesmentu mós ba Indonézia tanba Indonézia hanesan nasaun viziñu nu’udar parseiru ida importante liu ba Timor-Leste, tanba fronteira terestre no fronteira marítima kolaborasaun di’ak tebes. Indonézia tulun Timor-Leste iha setór seguransa no setór polítika liuliu adezaun Timor-Leste nian ba ASEAN.
Ikus liu, Xefe Estadu husu ba PNTL atu hala’o servisu tuir lei no orden no hala’o kna’ar ho profesionál liután hodi fó seguransa ne’ebé di’ak ba povu Timor-Leste.(*)
1,809 total views, 3 views today
Bele hare Video Seluk :
Subscribe to Timorpost
