DILI, (timorpost.com)— Ministru Defeza, Kontra-Almirante, Donaciano Costa Gomes ‘Pedro Klamar Fuik’, relata, daudauk ne’e númeru membru Falintil-Forsa Defeza Timor-Leste (F-FDTL) besik 3,500, inklui ona rekrutamentu foin lalais na’in-87.
“Agora ita iha forsa besik 3.500 ho rekrutamentu foun ne’ebé mak halo daudauk”, Pedro Klamar Fuik, informa ba jornalista sira hafoin partisipa serimónia selebrasaun transformasaun FALINTIL ba FDTL dala-23 iha Kuartel Jerál F-FDTL, Fatuhada, Sesta, (02/02).
Governante ne’e hatete, “Númeru forsa ne’ebé daudauk iha besik 3.500 ne’e ekivalente ho totál popoulasaun millaun ida resin ne’e pruvolta forsa ida sei ekivalente 300 pesoas populasaun, ne’e ladún efetivu. Kuandu di’ak liu ne’e, forsa ida ekivalente 200 pesoas populasuan, see ideál liu forsa ida ekivalente 100 pesoas populasaun, see forsa ida ekivalente 100 pesoas populasaun, signifika ita-nia populasaun millaun 1.3 pesoas ne’e ita-nia forsa tenke iha 13.000 militár”.
Ministru ne’e hatutan, ne’e korespendente ho kapasidade orsamentál ne’ebé fahe ba setór seluk hanesan edukasaun, saúde no selun tan ne’e fahe la to’o, tanba ne’e ema na’in-300 ekivalente ho forsa ida ne’e proporsionál, adekuadu ba realidade orsamentu ne’ebé Estadu atribui hodi bele sustenta forsa armada.
Enkuantu, tuir estudu Timor-Leste bele aumenta efetivu militár F-FDTL to’o na’in-5.600, nune’e presiza planeamentu atu forsa ne’e labele boot liu, tenke tuir Estadu nia kapasidade atu sustenta forsa. Forsa F-FDTL labele boot liu dimensaun rai Timor nian, lebela boot liu dimensaun populasaun Timor-Leste nian, nune’e Timor-Leste hakarak forsa ida ne’ebé mak ki’ik proporsionál atu bele satan netik kualker tentativa husi rai-seluk ne’ebé mak halo agresaun ba ita-nia soberania.
“Ita hakarak forsa ida ne’ebé mak ki’ik, forsa ida ne’ebé mak operasionál, efetivu, i forsa ida ne’ebé mak proporsionál, ida-ne’e siknifika saida? forsa ida bele satan netik kualker tentativa husi rai seluk ne’ebé mak atu bele halo agresaun ba ita-nia soberania nasionál”, Ministru Defeza hakotu.(*)
2,244 total views, 3 views today
Bele hare Video Seluk :
Subscribe to Timorpost
