DILI, (timorpost.com)— Komandante Polísia Nasionál Timor-Leste (PNTL) munisípiu Dili, Suprintendente Xefe Polísia, Orlando Gomes, apela ba komunidade, liuliu komunidade no joven sira iha kapitál Dili atu labele harii prezépiu selebrasaun Natál 2023 nian besik liu estrada no trotoar, tanba besik estrada bele hamosu engrafamentu iha estrada públiku.
“Ba komunidade no joven sira iha munisípiu Dili, ha’u hakarak fó hatene katak, prezépiu ne’ebé maka ita halo labele besik liu estrada, halo dook husi estrada para labele impede fali movimentu ema la’o ain sira no transporte”, Komandante Polísia Nasionál Timor-Leste (PNTL) munisípiu Dili, Suprintendente Xefe Polísia, Orlando Gomes, informa ba jornalista sira iha nia servisu fatin Kuartel PNTL Munísipu Dili, iha Kaikoli-Dili, Segunda, (20/11/2023).
Komandante PNTL munisípiu Dili mós husu atu labele utiliza prezépiu ne’e hanesan fatin diskoteka ida para joven sira atu anima-an iha laran, maibé harii prezépiu ne’e atu joven sira halo reflesaun ba moris tuir duni Nai Jesus Kristu nia moris hanesan ema iha mundu.
“Labele uza prezépiu ne’e para ba hamutuk iha ne’ebá loke múzika, dansa iha ne’eba, mas uza fatin ne’e sai hanesan fatin reflesaun ba moris nian”, Komandante ne’e husu.
Tanba joven sira kuandu uza prezépiu sai fatin animasaun maka bele hamosu fali provokasaun no bele sai problema, tanba ne’e husu ba joven sira iha Dili atu respeita prezépiu ne’e nu’udar reflesaun ida ba Natál nian.
“Kuaze tinan-tinan besik Natál joven sira sempre harii prezépiu iha fatin-fatin, maibé atu aviza ba komunidade no joven sira para harii prezépiu tuir distansia ne’e. To’o agora komandu Munisípiu Dili sei hein orden husi Komandu Jerál PNTL”, nia hatete.
Bainhira iha ona orientasaun husi Komandu Jerál nian mak Komandu PNTL munisípiu Dili sei kontrola joven sira halo prezépiu iha sidade Dili tuir orientasaun atu nune’e ema hotu kontente iha selebrasaun Natál 2023 no simu tinan foun 2024 nian.(*)
819 total views, 24 views today
Bele hare Video Seluk :
Subscribe to Timorpost
