DILI (Timor Post) – Relasiona ho Padre Abito José Casimiro Brites nia mate iha loron (22/08), iha area Dare, reprezentante família, Padre Juvito do Rego, deskonfia ema seluk mak hasai nia vida, la’ós hetan asidente tráfegu.
Nia hatete, matebian Padre Abito José Casimiro Brites, mak hetan asidente karik motor rahun hotu no asidente karik ida tuir iha kotuk ne’e bele mate, tanba rai lolon ne’e, tuir lolos iha kotuk ne’e mak todan.
“Tanba, lokraik matebian Padre Abito José Casimiro Brites, ne’e di’ak hela, maibé derepente nia mate iha Area Dare, tanba ne’e ami la simu nia mate ida ne’e, ami hakarak halo autópsia para hatene motivu husi mate ne’e, maibé rezultadu ida ne’e mak seidauk de’it,” dehan Padre Juvito iha Kuartel Jenerál Fatuhada, Tersa (30/0).
Tanba ne’e, iha Momentu ne’ebá sira Dioseze hola desizaun hodi halo autópsia, atu nune’e hodi hatene motivu loloos kona-ba Padre abito nia mate, tanba momentu sira to’o iha ne’ebá padre Abito ne’e mate tiha ona.
“Maibé, dehan atu nonok de’it, ami sei la nonok, tanba mate ida ne’e ita haree ho matan molik, ita hatene katak ne’e la’ós asidente, tanba ida tuir iha kotuk ne’e di’ak hela, ne’ebé husi ne’e ita bele dehan la’ós dezastre,” nia konta.
Tuir loloos rezulta iha ona, sira bele mai aprezenta, tanba momentu Padre Abito mate ne’e, Kardeál no Arsebispu Arkidioseze Metropolitana Dili, Dom Virgílio do Carmo da Silva, laiha, padre juvito ho Dioseze sira mak foti desizaun halo autopsia ne’e.
“Tuir loloos ne’e rezultadu ka infomasaun kona-ba Autópsia ne’e bele aprezenta ba ami, maibé kuandu sira la mai aprezenta katak sira iha razaun ruma, ami mós la bele ezije ba sira katak imi fó mai ami, tanba ami la’ós Ministériu Públiku,” nia hateten.
Ikus nia dehan, sira hein de’it rezultadu autópsia, tanba parte Fronsik iha Hospital Nasionál Guido Valaderes (HNGV), mós seidauk komunika ba família.
2,101 total views, 3 views today
Bele hare Video Seluk :