DILI (Timor post.com)—Iha loron Tersa (03/10/2023), karreta haikom husi Falintil-Forsa Defeza Timor-Leste (F-FDTL), ne’ebé hetan asidente tráfegu iha Fatuahi, Postu Administrativo Cristo-Rei Munisípiu Dili, rezulta membru F-FDTL husi Komponente Navál Hera na’in 14 Kanek.
Tuir kronolojia katak karreta Haikon membru F-FDTL nian mai husi Hera hala’o viajen mai Dili too iha Fatuahi hetan asidente tráfegu tanba travaun la iha.
Asidente ne’e akontese mais ou menus iha tuku sia liu minutu tolunulu (9:30) oras dadeer, bainhira membru sira ne’e ho karreta haikon sai husi postu Navál Hera atu halo viajen mai iha Dili hodi hala’o treinamentu merguilador nian.
Maibé iha area Fatuahi karreta haikon ne’ebé forsa sira uza travaun la han entaun kondutór deside tenke halai sai husi estrada hodi evita ba populasaun nia uma atu nune’e labele hetan estragu husi asidente ne’ebé sira hetan.
Husi asidente refere membru F-FDTL na’in 13 hetan kanek kaman no na’in ida seluk mak kondisaun grave iha nia ulun parte karuk no mós iha parte nia ain los.
Xefe Departamentu Emerjénsia Hospital Nasionál Guido Valadares (HNGV), Eldegar Lopes Martins hatete, iha tuku 9:30 simu informasaun husi Hera mai Dili tanba asidente ne’e envolve ema barak ona entaun husi ami parte HNGV liuliu Emerjénsia nian kompostu mós husi doutór Jerál no espesialista sira ne’ebé preparadu kedas atu hodi fó tratamentu ba sira.
“Asidente ne’e rezulta ema na’in 14 no husi númeru ne’e iha ema na’in 13 sira hetan kondisaun ne’ebé kanek kaman no iha ida mak nia hetan kondisaun ida ke grave tanba nia hetan pankada makaas liu iha nia ulun sorin no nia liman karuk ho ain los”. Hakotu
3,663 total views, 3 views today
Bele hare Video Seluk :
Subscribe to Timorpost
