DILI—Unidade Espesiál Polísia (UEP), ninia rekursu umanu sufisiente no daudauk preparadu ona, atu fó seguransa ba kampaña Eleisaun Parlamentár (ElPar).
“Ha’u hakarak atualiza de’it preparasaun seguransa ba kampaña Eleisaun Parlamentár, preparasaun dahuluk ita halo treinamentu fíziku ba ita nia membru Unidade Espesiál Polísia tomak, tékniku atu apoiu seguransa ba kampaña eleisaun tinan ne’e,” Komandante UEP, Superintendente Xefe Polísia Orlando Gomes, informa ba jornalista sira iha Kuartél Jerál PNTL, Kaikoli, Segunda (20/03).
Nia konta, daudaun ne’e fasilita membru sira treinu espesífiku, hodi hein bainhira iha orden komandu tun mai, atu koloka de’it membru sira ba fatin sira ne’ebé mak identifikadu.
“Ita preparadu ona, ne’ebé ita hein orientasaun komandu operasaun tun mai, ami bele dezeñu planu operasaun espesífiku ida, atu ita koloka ita nia membru UEP sira tuir risku husi komandu hatún mai Unidade Espesiál Polisia”, nia esplika.
Daudaun ne’e, membru UEP preparadu ona no prontu ona, atu asegura kampaña partidu polítiku sira ne’ebé atu hala’o kampaña iha territóriu Timor laran tomak. Maski partidu iha 22, maibé membru UEP ne’e rekursu sufisiente atu bele fornese seguransa ba atividade sira ne’e tomak.
“Ha’u ohin dehan katak UEP hein de’it planu própriu treinamentu ba CSP sira, batallaun orden públiku no mós ba forsa espesiál”, nia hateten.
Tuir Komandante UEP katak, fatin sira ne’ebé mak partidu polítiku sira halo kampaña, fatin sira ne’ebé mak sira atu realiza Eleisaun Parlamentár, ne’ebé prepara ona atu halo kolokasaun ba membru sira.
Alende kona-ba ekipamentu laiha problema apoiu ne’ebé komandu PNTL fó ho parseiru sira fó ba UEP sufisiente atu membru sira uza hodi halo kontrolu.
“Ha’u hanoin ekipamentu pesoál sira ne’e sufisiente para fasilita membru sira bele hala’o servisu di’ak liu”, nia garantia.
Total membru atu apoiu seguransa, komandante la temi sai númeru efetivu sira ne’e, maibé dehan de’it katak membru sufisiente atu koloka hodi fó apoiu ba seguransa iha kampaña refere.
1,552 total views, 3 views today
Bele hare Video Seluk :
Subscribe to Timorpost
