Dili(timorpost)–Parlamentu Nasionál (PN) liuhosi bankada Partidu Libertasaun Popular (PLP), duvida ho polítika Nonu Governu ne’ebé hasai ona despaxu hodi hapara kontratu funsionáriu kontratadu sira ne’ebé hala’o knar iha Instituisaun Públika (IP) no Empreza públika (EP) balun.
“Se ida ne’e mak realiza duni, ami duvida tebes ba Governu nia polítika ida atu buka reseita alternativa, governu nia polítika ida atu buka reseita doméstika, tanba empreza públika sira mós iha reseita própria no sira buka orsamentu rasik. Agora se hapara hotu kontratu sira iha empreza ho institutu públiku sira ne’e lori duvida mai atu kestiona katak, sera ké polítika ida atu buka reseita alternativa hodi hasa’e reseita doméstika ne’e sei alkansa ka lae iha NonuGovernu”, Prezidente Bankada PLP, Maria Angelina Sarmento, hateten iha Parlamentu Nasionál, Sesta (24/11).
Nia hatutan, governu ida-idak mai ho ninia polítika hodi jere instituisaun sira, no polítika Governu-dasia nian ne’e koko atu halakon IP no EP sira ne’e hodi redús gastu.
“Governu ida-idak lidera no jere ninia instituisaun, ha’u hanoin desizaun polítika ida ne’e reflete ba programa NonuGovernu nian, re-inteiraklaramente katak NonuGovernu iha planu atu estinji hotu institutu públiku sira ho empreza públiku sira ida ka rua,” nia esplika.
Maibé,deputada ne’e mós preokupa, tanba iha Empreza Públika balun ne’ebé sei hatama reseita alternativa ba kofre estadu.
“Ho razaun dehan institutu públika no empreza públika sira fó todan ba Orsamentu Jerál Estadu, talvez ho planu NonuGovernu nian ida ne’e mak halo sira ezekuta ona sira nia desizaun, Dezembru agora atu hapara hotu kontratu sira ba institutu públiku no empreza públiku sira nia funsionáriu no ajente administrasaun públika,” nia hatutan.
Enkuantu, tuir despaxu ne’ebé fó sai husi VisePrimeiruMinistru (PM), Ministru Koordenadór ba Asuntu Ekonomiano Ministru Turizmu e Ambiente, Francisco Kalbuadi Lay, iha loron Kinta (23/11), despaxu ne’e bazeia ba dekretu lei No-46/2023 loron 28 Jullu, hateten katak, ba dirijente no funsionáriu sira ne’ebé ninia kontratu remata iha loron 31 fulan Dezembru tiha ne’e labele kontinua renova ona.
Francisco deklara, karta notifikasaun ne’ebé daudauk ne’e sirkula iha públiku ne’e los duni, maibé notifikasaun ne’e ba de’it funsionáriukontratadu iha Empreza Públiku (EP) no Institutu Públiku (IP), ne’ebé tutela iha MKAE nia kabas.
“Ha’u halo karta ne’e so para ba ha’u nian de’it, la’ós ba ema hirak sira seluk, ema mak halo tiha informasaun laloos ne’e sai viral ka “hebo” tiha, ha’u hateten dala ida tan funsionáriu IP no EP sira lalika preokupa, karta notifikasaun hosi ha’u ne’e ba de’it IP ne’ebé iha MKAE nia okos, katak iha IP rua de’it mak hetan karta notifikasaun ba funsionáriu kontratadu sira,”Francisco Kalbuadi Lay hato’o informasaun hirak ne’e iha salaun multimedia GMN Bebora, Sesta (24/11).
Kalbuadihatete, funsionáriu Empreza Públiku no Institutu Públiku hirak seluk laiha, lalika mai politiza tan hodi halo buat ne’e sai “hebo” liután.
Enkuantu, tuir karta notifikasaun ne’ebé Timor Post asesu hosi sosiál media ne’ebé viral iha públiku, sita katak, karta notifikasaun ne’e notifika funsionáriu kontratadu sira ne’ebé nia kontratu sei termina iha loron 31 fulan Dezembru tinan ne’e.
Karta notifikasaun ne’e sai, tanba bazeia ba dekretu lei No 46/2023, data aprova dekretu lei iha loron 28 Jullu kona-ba lei orgánika Nonu Governu Konstitusionál liuhosi artigu rua no tolu.
“Liuhosi karta ida ne’e atu hateten ba dirijente sira hotu iha institutu públiku ho empreza públiku sira katak, funsionáriu kontratadu sira ne’ebé mak sira nia kontratu sei remata iha loron 31 Dezembru, sei laiha posibilidade atu renova,” sita karta notifikasaun ne’e, ne’ebé asina hosi Vise Primeiru Ministru, Ministru MKAE no Ministru Turizmu e Ambiente, Francisco Kalbuadi Lay.
4,084 total views, 24 views today
Bele hare Video Seluk :
Subscribe to Timorpost
