DILI, (timorpost.com)—Membru Polisia Nasionál Timor-Leste (PNTL), husi Komandu Dili nain-30 realiza re-treinamentu ho objetivu prevene konflitu no asegura seguransa durante vizita Amu Papa Francisco nian mai Timor-Leste ne’ebé sei monu iha loron 09-11 Fulan Setembru 2024.
Komandante Departamentu Pesoál no Formasaun, Superintendente Xefe Polísia Arquimíno Ramos hatete, treinamentu ba forsa rezerva ne’e ho objetivu atu prevene konflitu no asegura seguransa iha vizita Amu Papa Francisco nian mai Timor-Leste.
“Treinamentu ne’e limitadu, tanba ita iha limitadu apoiu de orsamentu, ho ida ne’e treinamentu ba de’it membru rill sira, ho númeru 30 pesoa ne’e, kada munisípiu sira, atu nune’e bele asegura seguransa ba vizita Papa mai Timor-Leste,” dehan Komandante Arquimíno Ramos ba jornalista sira hafoin remata abertura ba treinamentu iha edifísiu UEP, Bairro-Pite, Segunda (06/05).
Tuir nia, kursu sira hanesan ne’e, kursu atualizasaun oinsá mak bele fó hanoin sira nafatin sira oinsá uza regra forsa, no lei uza forsa nian, tanba ne’e téknika polisia sira ne’ebé atualizadu tenke kontinua ho re treinamentu sira hanesan, para sira hanoin, para medida sira iha treinu ne’e la bele fora husi regra sira ne’ebé PNTL iha.
“Ho ida ne’e, maka objetivu husi kursu ne’e para atu fó hanoin nafatin ba ita membru sira, para atu bele asegura vizita sua Santidade papa mai iha Timor-Leste,” katak nian.
Treinamentu ne’e ho durasaun semana ida, tanba kursu sira hanesan ne’e tinan kotuk mós lao no inklui tinan ne’e ida ne’e mós lao, mais nia númeru mak tenke limitadu, tanba bazeia mós ba orsamentu.
Iha sorin seluk, Komandante PNTL Munisípiu Dili, Superintendente Xefe Polísia Orlando Gomes, hatete, ligasaun ho vizita Papa mai iha Timor-Leste, komandu Dili iha preparasaun, liu-liu hare ba iha rekursu ba membru sira tomak.
“Hanesan ohin mós, ita koordenasaun ho membru sira para atu halo re treinamentu sira, liuliu ba fízika di’ak no hatene tékniku treinamentu nian, oinsá mak sira bele hatene observa situasaun no halo seguransa ne’ebé di’ak ba ita nian vizita sua Santidade papa mai iha Timor-Leste,” katak nian.
Nia dehan, preparasaun, agora daudaun komesa lao liuhusi formasaun sira, kontinua lao nafatin, komesa ona identifika ba fatin sira ne’ebé iha Dili laran, atu nune’e presiza koloka membru sira ba ne’ebá, hodi nune’e molok sua santidade papa mai nee, hakarak situasaun ne’ebé di’ak no halo aprosimasaun ho komunidade no inklui joven sira, para hotu-hotu garante situasaun di’ak para atu nune’e bele simu, papa mai Timor-Leste.
1,086 total views, 18 views today
Bele hare Video Seluk :