DILI, (TimorPost.Com)—Komandante Unidade Polísia Marítima (UPM), Superintendente Eugénio Pereira, informa, durante selebrasaun Natál iha loron 25 no 26 fulan-Dezembru komunidade barak mak paseiu iha tasi no kontrola katak laiha asidente ka insidente ruma iha tasi.
“Horseik no ohin loron (25 no 26 Dezembru), to’o iha lokraik ne’e ami-nia membru halo patrullamentu iha fatin paseiu tasi-ibun iha Dili laran, maiss laiha informasaun kona-ba asidente ruma iha tasi laran”, Komandante UPM, Superintendente Eugenio Pereira, informa ba Timor Post iha kuartel UPM Lesidere, Tersa,(26/12).
Komandante UPM ne’e hatete, tuir monitorizasaun ne’ebé membru UPM halo iha Dili laran, komunidade barak mak paseiu iha Kritu Rei, Uma Adat Tasi-tolu, tasi-ibun João Paulo nian, mai iha Pantai Kelapa, maibé ema ladún haris tasi tanba dalaruma haree anin boot no udan.
“Tuir informasaun husi membru sira informa, iha komunidade barak aproveita ba paseiu iha tasi ibun sira ne’e mais sira ladún haris tasi, sira tuur de’it ho família han hemu de’it ho família”, Komandante Eugenio, hatete.
Maske nune’e, membru UPM mantein kontrolu área tasi ibun sira atu nune’e bainhhira akontese insidente ruma iha tasi laran sira bele salva, liuliu antisipa komunidade sira ne’ebé halo paseiu iha área tasi ibun nian.
“Maske la akontese insidente ruma iha tasi laran, maibé ha’u orienta nafatin membru sira atu kontrola fatin paseiu sira ne’e para hodi antesipa”, Komaandante orienta.
Husi situasaun ne’e, Komandante UPM espera katak iha tinan ida-ne’e, komunidade kuidadu-an, karik ba ho família sira paseiu iha tasi ibun kuidade-an no kuidadu oan sira, karik akontese buat ruma informa lalais ba UPM no autoridade sira seluk para atu bele fó ajuda lalais.(*)
861 total views, 3 views today
Bele hare Video Seluk :
Subscribe to Timorpost
