DILI (timorpost.com) – Autoridade Munisípiu Dili (AMD) liuhusi Servisu Jestaun Kontrolu Merkadu Munisípiu Dili (SJKMMD) halo kontrolu iha terenu no konsege prende animal bibi ida iha area Kristu Rei nian.
“Ami ho ekipa kontrolu iha terenu iha area Kristu Rei konsege prende animal bibi ida ne’ebé komunidade husik abandona hela iha estrada públiku hodi prejudika transporte públiku no privadu bainhira halo movimentasaun iha terenu”, Xefe SJKMMD, Gaspar da Silva, hateten ba Timor Post iha nia knaar fatin Taibesi, Tersa (20/06).
Nia esplika, durante SJKMMD nia transporte operasaun aat no halo hela manutensaun iha ofisina, entaun atividade kontrolu animal ba komunidade husik abandona iha estrada públiku iha sidade Dili laran ne’e la halo atuasaun.
Tanba transporte halo operasaun atu tula sasán ne’ebé prende husi negosiante no komunidade laiha no mós sira nia ekipamentu Dima, Surik no Katana aat hotu, maibé agora karreta haat ne’ebé halo manutensaun ne’e rua di’ak ona no mós sosa ona Dima ho Surik foun.
Tuir nia, transporte agora di’ak ona ne’e bele fasilita membru sira hodi halo operasaun iha terenu, karik hetan animal ne’ebé komunidade abandona iha terenu entaun ekipa SJKMMD bele halo atuasaun liuhusi prende animal ne’ebé komunidade husi livre iha dalan públiku sira.
Nia afirma liután katak, ekipa SJKMMD tenke tun kaer oho animal ne’ebé husik livre iha sidade laran depois lori ba entrega iha Madre sira ne’ebé tau matan ba labarik orfanatu sira iha kapitál Dili ne’e.
“Ami prende animal bibi ne’ebé komunidade husik livre iha dalan públiku iha area Kristu Rei nian ekipa sira oho bibi ida lori ba entrega iha madre husi kongregasaun TMM Bekora hodi han, nia esplika.
Nia dehan, durante ne’e sira nia ekipa tun observa no identifika iha area Pantai Kelapa besik edifísiu Ministériu Negósiu Estranjeiru, area Tasi-Tolu, Kristu Rei no Bekora mak komunidade husik animal Bibi, Karau no Fahi abandona iha estrada públiku hodi prejudika transporte públiku no privadu nia movimentasaun ba mai la di’ak.
“Durante ne’e ami simu informasaun barak husi komunidade sira katak, komunidade barak iha Dili laran hakiak Fahi, Bibi no Karau, maibé sira la halo luhan ketak no la fase animal nia fo’er, entaun animal nia fo’er iis forte los hodi fó impaktu ba ema seluk”, Gaspar esplika.
1,962 total views, 3 views today
Bele hare Video Seluk :
Subscribe to Timorpost
