DILI (timorpost.com) – Governu liuhusi Sekretaria Estadu Igualdade no Inkluzaun (SEII) aprezenta relatóriu peskiza empoderamentu ekonómiku ba feto ba liña ministerial hamutuk 16.
“Ami aprezenta relatóriu peskiza empoderamentu ekonómiku ba feto iha nivel nasionál no nivel rejionál hahú iha tinan 2021-2023 ne’ebé durante ne’e SEII peskiza iha liña ministerial hamutuk 16 kona-ba sira nia servisu durante ne’e liga ba empoderamentu ekonomia nian ba feto iha nivel nasionál no nivel rejionál,” Diretora Nasionál Dezenvolvimentu Jéneru SEII, Francisca S. Sousa, hateten ba Timor Post iha Suai Room Maubara Plaza, Kuarta (31/05).
Diretora ne’e dehan, liña ministerial sira mak hanesan Ministériu Saúde, Ministériu Edukasaun Juventude no Desportu (MEJD) Ministériu Administrasaun Estatál (MAE), Ministériu Obras publika (MOP), MCAE, MSSI, MESSK, SEFOPE, SEA, SEII, SEKOOP no ministériu sira seluk tan.
Nia dehan, aprezenta relatóriu faze daruak nian ne’e liga ba liña ministériu ida-idak nia servisu empoderamentu ekonomia hodi hadi’a feto rural no feto urbana sira nia moris.
Nia dehan, ida ne’e atu bele harii sosiedade ne’ebé modernu, dezenvolve ekonomikamente no sosialmente bele hatuur iha prinsípiu inkluzaun, toleránsia igualdade jéneru nia okos hodi bele konkretiza prinsípiu ida ne’ebé bele la’o to’o iha ajente hotu-hotu tantu privadu no públiku.
Hodi nune’e, servisu ho kolaborasaun hamutuk atu konkretiza objetivu ne’ebé prevista ona iha planu dezenvolvimentu estratéjiku nasionál 2011-2030 hodi bele reflete iha programa governu konstitusionál dala ualu nian hanesan kestaun transversal ida ba asaun governativa tomak.
Tanba ne’e mak, SEII aprezenta relatóriu peskiza durante ne’e ekipa SEII nian halo iha terenu liga ba servisu husi ministériu ida-idak nian liga ba ajente ne’ebé envolve tantu privadu no públiku kompromete-an ona atu halakon diskriminasaun oi-oin hasoru feto no ema ho defisiénsia sira ne’ebé hela iha area rurais no urbana.
Ho ida ne’e mak SEII esforsu servisu hamutuk ho liña ministerial sira liga ba empoderamentu ekonómiku hodi bele enkoraja feto sira hodi partisipa másimu hodi kontribui ba iha dezenvolvimentu ekonómiku iha Timor-Leste.
Tanba ne’e mak oitavu governu konstitusionál adopta sistema ida ne’e iha loron Sesta feira fulan Outubru tinan 2018 no kontinua kompromisu ne’e atu implementa programa Maubisi ne’e mai to’o iha tinan 2023.
Hodi ezekuta iha ona iha igualdade jéneru atu fó apoiu fundu ba grupu feto agrikultura, iha area pekuáriu, floresta no peska, no mós apoiu integrasaun perspetiva jéneru iha nivel nasionál to’o iha nivel rejionál.
1,713 total views, 3 views today
