DILI (timorpost.com) – Governu liuhusi Ministériu Saúde (MS) servisu hamutuk ho Ministériu Agrikultura no Peskas (MAP) fasilita formasaun diagnóstiku ba Pesoál Saúde (PS).
“Ba oin ami sei servisu hamutuk ho MAP no parseiru One Health hodi fasilita formasaun diagnóstiku ba pesoál saúde sira hodi hasae sira nia koñesimentu no abilidade kle’an liután oinsá atu halo peskiza kona-ba moras Brucelose ne’ebé akontese,” prezidente Institutu Nasionál Saúde Públiku Ministériu Saúde, Merita Monteiro, hateten ba Timor Post iha salaun INSPMS Komoro, Tersa (20/06).
Nia afirma liután katak, daudaun ne’e governu liuhusi Ministériu Saúde iha ona polítika ida oinsá bele kapasita pesoál saúde sira para iha koñesimentu kona-ba halo diagnóstiku ba moras refere.
Aleinde ne’e mós, presiza aumenta rekursu umanu hodi servisu iha laboratóriu nian oinsá atu bele halo teste ba moras ne’ebé afeta liuhusi animal Karau Vaka nia sintoma husi isin manas.
Tuir doutora ne’e, moras refere perigu tebes entaun presiza servisu maka’as ho ministériu relevante no parseiru sira hodi halo vasinasaun oinsá atu bele kombate no prevene iha futuru labele hada’et ba malu.
Enkuantu, moras ne’e refere kona ona animal no bele afeta mós ba ema ne’ebé kontaktu besik animal, entaun nia bele hetan hotu moras ne’e, no bainhira la halo tratamentu ba iha sentru saúde sira ne’e bele halakon ema ne’e nia vida.
Iha sorin seluk, diretora nasionál veterináriu MAP, Joanita Bendita, hatete, MAP servisu hamutuk ho Ministériu Saúde ho parseiru sira mak hahú halo diskusaun iha loron ida tomak ne’e hodi halo preparasaun hodi prevene moras refere liuhusi vasinasaun no halo diagnóstiku.
Nia esplika, Governu iha polítika hodi kapasita formasaun ba médiku no tékniku pesoál saúde sira hodi hasae sira nia koñesimentu no abilidade ne’ebé di’ak oinsá atu bele iha koñesimentu di’ak atu halo diagnóstiku ba animal hotu-hotu liuliu Karau, Fahi no Manu.
Tanba ne’a mak governu iha planu ba futuru sei koloka médiku veterináriu no pesoál saúde no médiku espesialista sira husi Mensis sei halo tratamentu ba animal hotu-hotu nia saúde ho di’ak atu nune’e bele kombate moras refere.
1,197 total views, 3 views today
Bele hare Video Seluk :
Subscribe to Timorpost
