DILI (Timor Post)- Primeiru Ministru (PM), Taur Matan Ruak, inaugura ona laboratóriu nasionál, no halo mós lansamentu ba TB movel, ba diagnóstiku moras tuberkuloze.
“Ha’u uluk kedas sei lidera F-FDTL, ha’u preokupa ita tenke iha laboratóriu no materiál ba moras tuberkuloze nian, no ha’u husu ba Governu momentu ne’ebá tenke konsidera maibé la tau ba preokupasaun,” nia hateten iha Bidau Toko-Baru, Sesta (05/08).
Nia dehan, momentu sei hanesan Jenerál husu kedas Mákina ne’e, to’o sa’e ba Prezidente Repúblika, preokupa nafatin maibé Governu sira la tau konsiderasaun, maibé ohin konsege iha no halo ona lansamentu inklui inaugurasaun ba laboratóriu.
“Iha tinan 2011 ha’u preokupa, maibé depois de liu tiha tinan 11 konsege hetan duni no ohin ita hotu mai halo lansamentu ba ida ne’e,” hateten nia.
Nia hatete, Tuberkuloze moras ida ne’ebé sai preokupasaun ba Médiku no mós Governu, tanba ne’e konsege esforsu no hetan apoiu husi organizasaun nasaun Unidus no Organizasaun Mundiál Saúde (OMS).
“Ha’u lori Governu no Ministra Saúde nia naran hato’o agradesimentu ba Médiku sira tanba servisu maka’as nafatin hodi fó asisténsia ba ita-nia sidadaun sira, ho sasán sira ne’ebé iha ona imi bele salva ona ita-nia sidadaun sira-nia vida ba moras tuberkuloze,” deklara nia.
Xefe Governu ne’e subliña tan, nia fó parabéns ba Médiku sira tanba sira loron kalan servisu maka’as hodi fó tratamentu ba sidadaun sira hotu, no salva sidadaun sira-nia vida barak ona.
Serimónia inaugurasaun ne’e hahú iha tuku 08:30, iha Hospital Nasionál Guido Valadares (HNGV), hetan partisipasaun husi organizasaun mundiál saúde no parseiru dezenvolvimentu sira, inklui Ministra Saúde, Odete Maria Freitas Belo, hamutuk ho médiku sira ne’ebé haknaar an iha laboratóriu nasionál ne’e.
1,343 total views, 6 views today
