Dili (Timor Post) —Rui Paulo de Jesus, nu’udar sidadaun Timorense, hasoru Prezidente Repúblika (PR), José Manuel Ramos Horta, ko’alia kona-ba atu hadi’a sistema saúde iha rai laran.
Nia hatete, hanesan Timoroan ne’ebé serbisu iha rai li’ur, iha Organizasaun Mundiál Saúde (OMS), mai iha ne’e, ho kapasidade pesoál, orgullu no hato’o parabéns ba Prezidente no mós ba timoroan hotu ne’ebé iha ona Prezidente hanesan ne’e.
“Ha’u hanesan ema Saúde nian, konserteza ko’alia ho Prezidente Repúblika, hato’o ha’u-nia opiniaun balu, ha’u husu Prezidente ninia hanoin atu halo nusa mak ita bele serbisu hamutuk hodi hadi’a sistema saúde iha ita-nia Rai,” nia dehan iha Palásiu Prezidensiál Bairru-Pité, Kinta (18/08).
Nia dehan, profesionalmente iha observasaun ruma ne’ebé Rui sente hanesan Timoroan, la’ós kapasidade hanesan reprezentante OMS ninian ba rai ne’ebé nia serbí oras ne’e iha Butan, maibé hanesan profisionál no hanesan Timoroan.
“Ha’u hanoin kona-ba Saúde atu sai di’ak, ita iha ona sistema ne’ebé iha fatin, maibé kualkér ne’e konserteza iha lakunas oin-oin, ne’ebé ha’u haree esforsu tomak husi ita-nia Lideransa sira no Governu, ha’u fiar katak, serbisu hamutuk ho ita hotu, hanesan iha baibain dehan, ita-nia saúde iha ita liman rasik,” nia relata.
Ne’e duni nia dehan, nu’udar sidadaun Timorense haree ba Autoridade hala’o sira-nia serbisu, hanesan populasaun, hanesan povu Timor-Leste nian, husi ne’e ema hotu-hotu tenke kontribui ba halo nusa mak atu hadi’a sistema saúde iha Rai ne’e.
“Ita-nia Rai ukun an, ha’u iha oportunidade atu serbí, katak Timoroan mós bele. la’ós iha ita-nia rai de’it, maibé ita mós hetan fiar atu ba serbí iha organizasaun ne’ebé ita sai hanesan membru, nune’e ita rai mós membru hanesan OMS,” nia argumenta.
Nia hatutan, “Ha’u komesa iha Butan ne’e tinan lima ona hanesan reprezentante, maibé antes ne’e dezde 2005 ha’u serbí iha New Diely Índia, iha Risnar Ofice OMS. Maibé sei kontinua serbí iha ne’ebá, karik iha tempu badak, ha’u muda ba fatin seluk, depende ba organizasaun mak sei tau ha’u iha ne’ebé”.
Ikus nia dehan, Prezidente nia mensajen mak, “ha’u hanoin hanesan aman, sempre fó liafuan di’ak, atu muda, ita hanesan oan ba rai ida ne’e, atu nune’e ba serbí iha fatin seluk mós, serbí hodi hatudu mós dignidade ita-nia rai nian, para serbisu mais profisionál”.
2,846 total views, 3 views today
Bele hare Video Seluk :
Subscribe to Timorpost
