DILI(TimorPost)–Diretór Klínika Hospital Nasionál Guido Valadares (HNGV), Marcelino Correia, informa, durante ne’e Timor-Leste asina akordu ho nasaun tolu maibé nasaun rua mak aseita hodi simu pasiente Timor oan ba konsulta iha ne’ebá.
Nia hatete, nasaun tolu ne’ebé antes ne’e asina akordu ho governu Timor Leste maka hanesan Indonesia, Malázia no Singpura. Hosi nasaun tolu ne’e Indonesia ho Malazia maka aseita enkuantu Singapura to’o agora seidauk iha resposta.
“Ba pasiente Sira ne’ebe mak atu ba halo tratamentu iha rai li’ur, iha nasaun rua husi Indonézia ho Malasia mak aseita ba halo tratamentu”, nia informa ba Jornalista iha knaar fatin HNGV, Bidau.
Nia hatete, nasaun singapura to’o ohin loron seidauk iha resposta kona-ba utilizasaun pasaporte ida-ne’ebé mak prazu liu ona.
“Bainhira Singapura la simu pasiente sira ne’ebé mak utiliza pasaporte stempel, ho ida-ne’e HNGV sei Transfere pasiente na’in-rua ne’ebé mak transfere ba Singapura muda fali ba iha Jakarta, Indonézia “, nia dehan.
Pasiente sira ne’ebé mak ba halo tratamentu iha rai li’ur ne’e mai ho Kazu moras fuan, kankru no tumor ne’ebé maka presiza halo operasaun.
Pasiente sira ne’ebé maka junta medikasaun aprova mai iha HNGV hodi atu kontinua hala’o tratamentu iha rai liur, hamutuk 100 ida resin, númeru ne’e seidauk inklui sira ne’ebé mak sei iha hela prossesu ba preparasaun dokumentu.
Númeru ida-ne’e mak agora daudaun HNGV halo hela pedidu ba iha Notariadu, atu nune’e bele prossesa pasaporte, tantu pasaporte sira ne’ebé mak prazu liu ona no sira ne’ebé mak pasaporte laiha liu.
No agora daudaun balun komesa prosesa ona no balun hetan ona pasaporte ne’ebé mak stempel lori mai hodi hetan prossesa kontinuasaun ba iha diresaun nasionál servisu hospital, atu nune’e bele kontinua prossesa transferénsia moras ba iha rai li’ur.
Husi lista ida-ne’e, iha pasaporte ba diplomata hamutuk 11, pasaporte ne’ebe iha maibé mate ona mak kontinua ho pasaporte stempel atu nune’e bele ba halo tratamentu iha rai liur.
Nia hatutan, relasiona ho kestaun kaderneta pasaporte ne’ebé to’o agora laiha, HNGV halo ona enkontru ho diresaun notariadu Ministériu Justisa no Ministériu Negosiu Estranjeiru no Kooperasaun (MNEK) no iha konkordansia katak ba sira ne’ebé mak pasaporte prazu liu ona hodi ba tau stempel no ba sira ne’ebé mak pasaporte laiha liu sei utiliza pasaporte diplomata.
681 total views, 3 views today
