DILI (timorpost.com) — Xefe Suku Bairru-Pité, João Batista da Costa Belo, relata iha nia suku bee moos la’o di’ak, maibé identifikadu populasaun 195 mak halo ligasaun ilegál.
Nia hatete, hosi ligasaun ilegál hirak ne’e balun uza Sainu mak hodi supa bee, entaun agora afeta volume bee menus ba populasaun balu husi Aldeia Ruanulu Resin Neen (26) iha suku Bairru-Pité, postu administrativu Dom Aleixo, Munisípiu Dili.
“Kuandu tempu bai-loron Bee ne’e menus. Pior liu maka maluk sira ne’ebé uza saiñu hodi liga Bee illegál, la hanoin maluk sira ne’ebé la uza saiñu ne’e, ida ne’e mak estraga fali ema seluk, afinál Bee ne’e to’o hela”, nia hateten ba Timor Post Online, iha Suku Bairru-Pité, Segunda (26/09).
Nia dehan, foin daudauk husi parte Ministériu kompetente bee nian, sira identifika tiha ona Bairru-Pité ema balu liga Bee Moos illegál uza saiñu, hein de’it husi parte Ministeriu kompetente sira mai haree, tesi hodi multa, tanba sira halo ida ne’e mak ema seluk la hetan bee.
Tanba ne’e Xefe Suku husu ba populasaun Bairru-Pité tenke hakruk ba lei, klaru hotu-hotu iha Lei nia okos, lei ne’e povu nian, husi povu mak halo lei, entaun populasaun hotu-hotu tenke hakruk ba lei.
“Iha 195 hanesan ne’e mak liga illegál, nune’e agora iha ona dadus katak sira ne’e uza duni, tanba ne’e sei iha ekipa ida hodi ba tesi hotu tiha mak haruka sira multa, ne’e atu labele uza tan illegál hodi estraga ema seluk,” nia relata.
Ho ida ne’e nu’udar Autoridade Lokál husu nu’udar sidadaun tenke simu konsekuensia, nu’udar sidadaun labele halo asaun kuandu ekipa ba atu tesi saiñu ne’e, tanba ema avizu dehan labele tuu saiñu ba torneira hodi estraga maluk sira seluk.
Ikus nia dehan, ema ne’ebé toma konta bee ne’e nia liga para hotu-hotu hetan, tantu barak, uitoan mais hotu-hotu hetán, se halo hanesan ne’e, hatudu katak halo terus maluk sira seluk, ne’e labele, ne’e kontra ona Lei ne’ebé hatete no aplika, tanba ne’e nu’udar sidadaun tenke simu konsekuensia.
2,375 total views, 3 views today
