Dili(timorpost.com)—Eis Jogadór Miro Baldo Bento, dehan sai jogadór iha Timor-Leste ne’e hanesan talentu ema no joven sira nian, maibé la’ós atu sai riku hanesan ema nasaun seluk.
Nia hateten, tanba haree ba kondisaun no situasaun nasaun nian iha rai laran inklui foin ukun-an entaun futeból iha rai laran seidauk bele muda ema nia moris liu-liu sustenta nesesidade hanesan jogadór ida, kompara ho ema nia nasaun sira seluk.
“Ha’u dehan hanesan ne’e, ema agora riku iha mundu ne’e, ema desportiva liu-liu sira futeból Basket Ball, Volley Ball no Tenis no seluk tan, tanba iha ema nia rai buat hotu kompletu ona no ema muda ona buat ne’e ba bisness ida”, Eis Jogadór Miro Baldo Bento, iha Taibesi, Domingu (16/07).
Nia subliña, haree ba iha futeból Europa no seluk tan, kuandu sai ona jogadór di’ak, hodi kompete ona liga primeiru segundu no terseiru divizaun, signifika sira nia moris iha mudansa no família tomak mós iha ona mudansa.
“Tanba klube sira komesa sosa sira ka fó kontratu ba sira ho folin ne’ebé mak boot, inklui sira nia saláriu, seidauk produsaun sira bolu sira hodi halo promosaun ka kontratu, entaun sira hetan osan hosi buat sira ne’e, maibé ita difisil uitoan”, nia dehan.
Difisil tanba, klube sira kontratu jogadór mós ho osan ki’ikoan tebes, depois kontratu époka de’it, tanba depende ba atividade liga no liga mós joga tinan ida deskansa tinan rua entaun ida ne’e mak halo difisil.
Seidauk konta ho ekipamentu ba jogadór sira fatin treinu ba jogadór sira, infraestrutura, buat barak loos, entaun difisil loos, ho ida ne’e mak jogadór barak hili ba buka servisu seluk no ba buka servisu iha rai li’ur, tanba hirak ne’e.
“Maski nia jogadór ida ne’ebé mak di’ak iha poténsia boot, maibé kuandu nia hetan ona servisu iha instituisaun, nia husik ona bola, tanba ida fó han nia loron kalan no responde ba nia nesesidade mak servisu iha instituisaun ne’e, la’ós hetan hosi bola ne’e, tanba ne’e mak ita nia jogadór sira barak performa tun no sira deskansa sedu”, nia esplika.
Ho buat hirak ne’e hotu mak ohin dehan, iha Timor-Leste ne’e sai jogadór, tanba sira iha talentu nanis duni, la’ós hanesan ema nia nasaun sira seluk la hatene mak ba aprende ka treinu mak foin sai jogadór, iha ne’e hatene nanis ona mak ba treinu uitoan sai jogadór.
933 total views, 6 views today
Bele hare Video Seluk :
Subscribe to Timorpost
