DILI (timorpost.com) – Vise-Ministru Interior, Antonio Armindo, hetan akompañamentu hosi Komandante Jerál PNTL, Komisáriu Jerál Henrique da Costa, no Segundu Komandante Jerál Komisáriu Pedro Belo, hala’o vizita ba Komandu Jerál PNTL hodi haree besik mini laboratóriu ne’ebé durante ne’e uza hodi fasilita Departamentu Investigasaun Kriminál Nasionál (DIKN), hala’o knaar iha area investigasaun kriminál nian.
“Ita mai haree direta situasaun iha laboratóriu PNTL nian no ita husu Komandante Jerál atu halo pedidu urjente nune’e Governu bele buka meius liuhosi parseria TLPDP hodi apoia tan ekipamentu balu ne’ebé bele fasilita ekipa Forensik sira atu hala’o sira nia knaar nu’udar meius importante ba investigasaun kriminál nian no mós ajuda atu halo ezaminasaun ne’ebé maka bele hala’o iha rai laran rasik,” Antonio Armindo hateten iha Komandu Jerál PNTL, Kaikoli, Tersa (06/06).
Nia dehan, mini laboratóriu Forensik ne’e bele fasilita ezaminasaun balístiku, ezaminasaun finger printing, ezaminasaun toxicologia (veneno), ezaminasaun dokumentu no ezaminasaun seluk ne’ebé presiza apoiu laboratóriu hodi buka evidénsia.
“Ita sei halo esforsu liuhosi parseria sira hodi buka tulun hodi moderniza ita nia sistema, tanba durante ne’e ita sempre haruka sampel ba rai li’ur atu halo teste laboratóriu ne’ebé gasta osan barak no tempu ne’ebé naruk, maibé seidauk iha serteza ba rezultadu tanba ne‘e maka ita halo esforsu no posibilidade hotu-hotu atu halo ezaminasaun iha timor tuir ita nia ekipamentu no rekursu umanu ne’ebé maka iha”, nia hateten.
Mini laboratóriu ne’e konstrui ho apoiu finanseiru no tékniku husi parseiru Timor-Leste Police Development Program (TLPDP).
Iha tinan kotuk, laboratóriu ne’e iha ekipamentu ne’ebé maka PNTL simu husi doadór sira hanesan governu Australia, Korea, Xina no Governu Estadus Unidus Amérika (EUA).
1,314 total views, 3 views today
Bele hare Video Seluk :
Subscribe to Timorpost
