DILI (Timor Post)- Polisia Nasionál Timor-Leste (PNTL), Komandu Munisípiu Dili, liuhusi Tránzitu Rodaviaria, fó ona ultimatu loron 90 ba karreta Na’in, hodi bele foti karreta aat estasiona iha estrada públiku ne’ebé ra’ut iha seaman kotuk.
Komandante Unidade Tránzitu Munisípiu Dili, Inspetór Xefe Polisia Domingos Sarmento Gama, hatete karreta aat hirak ne’ebé sira prende iha Tersa (26/07), ne’e, na’in sira hahú kumpre daudaun sansaun administrativu iha komandu Munisípiu Dili.
“Na’in ba karreta aat balun iha ona inisiativa mai selu daudaun ona no balu iha ona prosesu atu mai selu no mós balun mak seidauk mai, mais iha semana kotuk ha’u fó sai ona katak sira-nia parte fó tempu iha loron 90, atu mai selu sira-nia devér”, nia hateten ba Media Online Timor Post, Domingu (31/07).
Nia dehan, iha loron 90 ne’e mak la mai selu, sira-nia parte sei entrega hotu karreta hirak ne’e ba iha patrimóniu Estadu.
Antes ne’e mós Komandante ne’e, hatete ona sira halo aprensaun ba Karreta aat sira ne’ebé para iha estrada públiku tanba difikulta movimentu iha Dili laran.
“Ita identifika fatin barak mak sidadaun sira para fali sira-nia karreta iha estrada públiku hanesan tiha fali fatin privadu, ne’e sira kontra Lei kódigu estrada, tanba ne’e komandu Jerál hatún despaxu hodi ami ezekuta atu foti hotu karreta hirak ne’e,” nia hateten iha Bairru Grilhos, Tersa (26/07).
Nia reforsa tan, tanba ne’e ohin sira hahú foti ona kareta aat sira ne’ebé durante para de’it iha estrada públiku iha kapitál Dili ne’e, hodi fó livre ba transporte públiku sira halo movimentu.
1,341 total views, 3 views today
