DILI, (timorpost.com) — Jenerál Reformadu Lere Anan Timur, hatete ró Haksolok daudauk ne’e iha hela prosesu konstrusaun no tinan oin 2024 ró refere prontu ona.
Jenerál Reformadu Lere Anan Timur, no Xefe Estadu Forsa Defeza Timor-Leste, Tanenti Jenerál, Falur Rate Laek, reprezenta espesiál Prezidente Repúblika partisipa iha loron Independénsia nasaun amigu Guiné-Bisau ba dala-50. Hafoin partisipasaun ne’e Jenerál Reformadu Lere Anan Timur, no Tanenti Jenerál, Falur Rate Laek, liuhosi Portugál hodi haree direita estaléiru ba konstrusaun, nune’e lori mós novidades di’ak kona-ba ró Haksolok.
“Ha’u ko’alia ho ita-nia Xefe Estadu Maiór Jenerál Forsa Armada, Komandante Falur, ami mós halo vizita por kuriozidade, para hasai duvidas iha Timor kona-ba ró Haksolok, ha’u hanoin katak ohin ami-nia entrevista ida-ne’e halo Timoroan haksolok duni, boatus ne’ebé ita rona dehan ró laiha, feruzing, ne’e laloos, ró ne’e atu di’ak ona, ha’u bele dehan 2024 ró prontu ona”, Jenerál Reformadu Lere Anan Timur, akompaña husi Xefe Estadu Maiór Jenerál FALINTIL Forsa Defeza Timor-Leste (F-FDTL), Tenente Jenerál Falur Rate Laek, informa ba jornalista iha salaun VIP Aeroportu Internasionál Prezidente Nicolau Lobato, Komoro-Dili, Tersa,(21/11/2023).
Konstrusaun ba ró Haksolok daudauk ne’e atinji ona pursentu 80 (80%).
“Fábrika nain dehan mai ami katak, 80% ró ne’e di’ak ona, agora ita hein para labele espekula katak ró ne’e motor laiha, feruzen, entaun ami na’in rua ba haree ho matan, katak afinál ró ne’e di’ak ona, ne’e maka haksolok ba Timor, haksolok mós ba ita-nia inan-aman sira iha Oe-Kusi”, Lere Anan Timur, hatete.
Lere sujere bainhira ró di’ak labele kontente de’it maibé oinsá prepara rekursu umanus tanba daudauk ne’e laiha tékniku ida mak akompaña prosesu konstrusaun refere, tanba ne’e mak husu ba Governu Konstitusionál dasia (IX) atu haruka mós tékniku sira hodi akompaña atu nune’e abitua ho operasionalidade ró Haksolok nian.
“Ita-nia Governu tenke haruka ona tékniku iha tinan ida-ne’e nia-laran ka ou inísiu 2024 ne’e haruka ona ema ba, 2024 ne’e tarde liu ona, para bele ba abitua, ida-ne’e maka importante”, Lere Anan Timur hakotu. (*)
2,016 total views, 15 views today
Bele hare Video Seluk :
Subscribe to Timorpost
