DILI (pimorpost.com) — Komandu Polisia Nasionál Timor-Leste (PNTL), Munisípiu Dili, iha ona planu atu halo avaliasaun ba servisu Konsellu Polisiamentu Komunitariu (KPK), molok halo servisu voluntáriu asegura seguransa iha Munisípiu Dili.
Komandante PNTL Munisípiu Dili, Superintendente Xefe Polisia Natérsia Eufrásia Soares Martins, hatete sira iha ona planu atu halo avaliasaun servisu ba KPK molok orienta sira halo servisu voluntáriu hodi asegura seguransa iha Munisípiu Dili.
“Ha’u rekoñese KPS sira-nia servisu no hanesan komandante foun iha ne’e, relatóriu balun ha’u hetan kona-ba KPK nia servisu iha rezultadu di’ak, maibé iha buat balun ita presiza halo revizaun,” nia hateten hafoin diálogu ho Arte Marsiál ho Ritual 77, iha Komandu PNTL Munisípiu Dili, Kuarta (25/01).
Nia dehan, KPK fó apoiu ba Autoridade Suku no Autoridade Polisia atu nune’e deteta identifika problema sira ne’ebé mosu iha suku laran, hodi bele tuut hamutuk buka nian solusaun, maibé sira uza servisu KPK halo fali voluntáriu.
“Ita halo avaliasaun haree tiha KPK sira-nia manual ne’e lai, depois ita halo suru-mutu ida ho KPK ho autoridade lokál sira, ita esplika kona-ba servisu saida mak sira halo iha suku no bairru”, nia hateten.
Nia haforsa tan, bainhira halo tiha soru-mutu ho KPK sira, hodi bele ajuda autoridade sira, solusiona problema ne’ebé mosu iha suku no bairru.
Nia konta, suku ne’ebé tama iha area jurídiku Munisípiu Dili, KPK iha hotu ona, maibé tanba sá mak kontinua mosu nafatin konflitu no problema iha suku, PNTL presiza halo avaliasaun ho estudu ida atu analiza, tanba saida mak hamosu KPK problema kontinua mosu.
“Problema no krime kontinua mosu ne’e, ha’u sei haree ida ne’e atu hadi’a no buka dalan oinsá mak rezolve liuliu aspetu prevensaun krime, oinsá mak garante seguransa ba ema hotu ho di’ak,” nia hateten.
Ikus nia dehan, sira sei halo avaliasaun ba KPK sira-nia servisu hodi hadi’a tan buat balu, atu nune’e evita problema no krime iha area jurídiku Munisípiu Dili.
751 total views, 6 views today
