DILI (Timor Post) – Polisia Nasionál Timor Leste (PNTL) liuhusi Seksaun Tránzitu Munisípiu Dili, informa ba komunidade sira atu ba selu infrasaun ba karreta sukata ne’ebé sira-nia parte rekola ka ‘raut’ ona iha loron (26/07), tanba liu loron 90 sei entrega ba iha Patrimóniu Estadu.
Tuir Xefe Seksaun PNTL Tránzitu Munisípiu Dili, Inspetór Domingos Sarmento Gama, hatete Karreta aat ne’ebé estasionamentu iha estrada públiku, foin lalais sira-nia parte foti ne’e, iha ema nain ida mak selu ona no nain rua seidauk selu, tanba iha hela prosesu nian laran.
“Ita hein, konforme na’in sira mai foti, durante iha tempu detru de 90 dias, maibé liu ona loron 90 mak sira la mai, entaun afavor ona ba estadu, ida ne’e tuir lei dekretu númeru 6/2003, lei kódigu estrada iha artigu 162 mak ko’alia,” dehan Gama ba Timor Post Online iha nia knaar fatin, Sábadu (13/08).
Nia dehan, karreta aat sira ne’ebé sira-nia parte foti ne’e, agora atu besi tama ona ba iha fulan ida, hela fula rua hodi kompleta ba iha loron 90, mais kuandu liu fulan tolu ka loron 90, entaun na’in ba karreta sira laiha ona direitu, maibé tama ona ba iha patrimóniu estadu.
“Agora karreta tolu, ne’ebé ita foti ne’e, sei iha hela fatin patrimóniu estadu, iha ema nain-ida mak selu ona koimas 120 USD, tanba ne’e mak nia foti ona nia transporte,” nia dehan.
Alende ne’e nia dehan, nia parte hakarak fó mesajen ba konunidade sira, tuir lolos tranporte aat sira ne’e, rai iha sira nia fatin privadu, labele rai iha estrada públiku.
“Tanba ne’e, foin lalais ita foti, maibé to’o agora iha ema ida de’it mak selu ona, maibé sira seluk seidauk mai foti, tanba ne’e nia husu ba komunidadade sira atu mai selu, atu nune’e bele foti fali sira-nia karreta.
Ikus liu nia dehan, atividade hanesan ne’e sei kontinua nafatin, tanba ne’e nia husu ba sidadaun sira, atu foti sai sira-nia karreta aat ne’ebé estasiona iha hela estrada públiku, se la foti, banhira sira halo atividade hanesan sei rekola ka ‘raut’ hotu.
1,078 total views, 3 views today
