DILI (timorpost.com) – Asidente Tráfegu iha Kuarta (23/11), mais ou menus iha oras tuku 02:00 liu, entre karreta Mikrolete ho Ambulánsia iha Area Hera, rezulta vítima ho naran Ana do Rosário da Costa, lakon vida.
Tuir informasaun balun husi família matebian, hatete karreta mikrolete ne’e, matebian ho nia kaben mak iha laran, diresaun mai husi Dili atu ba Munisípiu Baukau, maibé derrepente iha area metinaru nian matebia ho nia kaben hetan asidente hodi rezulta Ana do Rosario da Costa mate fatin kedas.
Nia dehan, sira rona informasaun, katak karreta Ambulánsia diresaun mai husi Baukau Baguia, derepente karreta rua ne’e soke malu, maibé sira-nia parte seidauk hatene loloos motivu saida mak karreta rua soke malu no ida ne’ebé mak sala no los, tanba laiha fatin akontesimentu.
“Ami hatene, katak matebia nia laen kaben mak lori karreta mikrolete ne’e, na’in-rua horsehik mai husi Baukau atu hola sasán kios nian no ai-moruk balun, nune’e horisehik na’in-rua deskansa iha Dili no ohin mak atu fila ba Baukau, maibé derrepente iha dalan klaar hetan asidente no rezultadu ami-nia feton no bin mate fatin,” dehan nian ba média online Timor Post, iha Hospital Nasionál Guido Valadares (HNGV), Kuarta (23/11).
Nia dehan, karreta Ambulánsia ne’e hatene kondutór de’it, tula moras ka lae sira la hatene no nain hira mak iha laran ne’e sira-nia parte hanesan família la hatene.
Nia hateten, matebian ne’e husik hela oan feto ki’ik ida, foin mak tinan rua. Nune’e mós, mate-isin la halo autópsia no daudaun ne’e família sira deside lori kedas ba iha hela fatin Baukau Teriloka, matebian ne’e husi Munisípiu Baukau, ema Gariwai nia ona, nian kaben ho mane ema Teriloka nian.
Tuir observasaun média online Timor Post, nian iha terrenu, daudaun ne’e matebian iha hela mortuáriu HNGV, Matebian nia kaben hanesaan kondutór karreta Mikrolete ho kondutór Ambulánsia, daudaun ne’e baixa hela iha HNGV, parte Emerjénsia nian.
Enkuantu, jornalista tenta atu entrevista parte Polisia Nasionál Timor-Leste (PNTL), liuhusi polisia Tránzitu iha HNGV, maibé sira la fó komentáriu, katak dadus seidauk kompletu.
1,939 total views, 3 views today
