Husi: Livio da Conceição Matos
Antesedentes: Sientista barak maka fo definisaun konaba saude diak ba ema, maibe jeralmente sira ne’e iha konkluzaun ida katak saude diak maka status kompletu ema ida nian ne’ebe kompostu husi fizikamente diak, psikolojikamente diak, sosioekonomikamente produtivu no laos deit livre husi moras no infirmidade. Ema ruma ne’ebe priense kiriteria lima iha leten, hafoin bele konklui katak ema ne’e saude diak. Oinsa ho ema Timor sira? Ekonomikamente, karik Timor-oan barak maka seidauk produtivu. Ema barak maka laiha servisu, no iha tempu hanesan, ema barak maka finaliza nia estudu maibe iha esperansa ladun atu bele hola parte iha kampu servisu. Ema barak maka servisu ho produtividade ki’ik no iha tempu hanesan ema barak maka husu servisu maibe la hetan. Desempregu ka pengangguran iha Timor-Leste aumenta ba beibeik. Ema barak mak gradua husi universidade maibe laiha kampu servisu, tenke forma hodi trata dokumentu hodi ba buka servisu iha ema nia rain ne’ebe halo labarik balun lakohi eskola tiha deit. Eskola ho la eskola hanesan deit. Hotu-hotu trata dokumentu atu ba rai liur. Hare husi perspetiva saude publika, Timor-oan barak mak seidauk atinji kategoria saude diak.
Teorikamente, kresimentu Ekonomia nasaun ida sukat ho sasukat ka indikador oin rua nebe kompostu husi Gross Domestic Product (GDP) no Gross National Product (GNP). GDP sukat rendimentu ka income husi ema tomak iha nasaun ida nia laran. Ema sira ne’e bele ema ho sidadaun nasaun refere nomos ema sira ne’ebe laos sidadaun nasaun refere ne’ebe hala’o hela atividade iha nasaun refere. GNP indikador ne’ebe uza hodi sukat rendimentu ka income husi sidadaun nasaun refere ne’ebe servisu iha rai laran nomos iha rai liur. Atu sukat kresimentu ekonomia nasaun ida, bele uza indikador rua ne’e hotu iha tempu ne’ebe hanesan. Nasaun avansadu, babain uza GNP atu sukat sira nia kresimentu ekonomia. Tanbasa? Karik GNP boot liu GDP, ne’e hatudu katak nasaun refere investe barak iha nasaun seluk. Hodi nune’e nia emar sira ne’ebe servisu iha rai liur kontribui maka’as ba kresimentu ekonmia nasaun. Wainhira GDP boot liu GNP, ne’e hatudu katak investimentu nasaun refere ba nasaun seluk sei ki’ik no nasaun refere sei depende maka’as ba investimentu husi nasaun seluk ba sira nia nasaun. Situasaun ida ne’e hatudu katak nasaun refere , nasaun ida ho GDP boot, sei iha prosesu dezenvolve an dadaun tanba seidauk iha kbi’it husi nia sidadaun ka estadu rasik, atu bele investe iha nasaun seluk. Timor-Leste iha ne’ebe?
Timor-Leste deklara ninia independensia ba Mundu iha Tinan 1975, no restaura ninia independensia iha tinan 2002. Tinan 40 resin ona Timor-Leste hases an husi kolonialista Portugues no tinan 20 resin Timor-Leste kore-an husi okupasaun nasaun viziñu Indonesia. Iha mudansa barak maka akontese ona iha rai ida ne’e nudar nasaun. Akontesimentu hirak ne’ebe akontese durante restaurasaun independensia maka hanesan: troka malu iha pozisaun presidente dala lima ona, troka malu iha pozisaun membru parlamentu nasional dala lima ona, troka malu iha pozisaun presidente tribunal dala lima ona, troka malu iha pozisaun seluk-seluk nebe akontese dalawain ona iha rai doben ida ne’e. Buat ida mak seidauk iha mudansa iha povu rai ida ne’e mak “hanoin atu iha moris diak ba ema hotu-hotu iha rai pedasuk ida ne’e.”
Durante tinan ruanoulu resin Timor-oan restaura ninia independensia, kaer kuda talin rasik ba manajementu dezenvolvimentu nasional, Timor-oan dala barak ezekuta osan minarai, ne’ebe mai husi osan mina tasi Timor, maibe seidauk iha hanoin atu hetan fontes seluk ne’ebe bele subtitui osan minarai karik ita labele uza osan mina ba dezenvolvimentu nasional iha periodu tempu ruma. Atitude “uza deit” laos deit akontese iha jerasaun ida ne’e, maibe akontese ona iha tempu pasadu.
Wainhira ita hare retrospetiva ba iha pasadu, akontesimentu periodu ekonomia ne’ebe lori osan boot mai iha Timor, akontese dala tolu ona. Periodu dahuluk maka “periodu Aikameli.” Iha momentu ne’e ema barak mak nadodon mai Timor hodi sosa Timor-oan nia aikameli. Timor-oan iha osan ne’ebe ho montante boot iha momentu ne’eba. Periodu daruak maka “periodu Kafe.” Iha momentu ne’e ema barak mak nadodon mos mai Timor hodi sosa Timor-oan nia Kafe. Timor-oan iha osan ne’ebe ho montante boot iha momentu ne’eba tanba faan kafe. Periodu datoluk maka “periodu Minarai.” Iha momentu ne’e ema Timor la faan ninia minarai rasik. Ema seluk ho tenolojia as, peritu ho koñesimentu maka’as maka kaer minarai Timor. Hahu husi identifika mina iha tasi, monta “alat berat” hodi supa minarai, monta “alat berat” hodi rai to’o fa’an mina ne’e, Timor-oan barak maka “la pusing” tanba sira nunka involve prosesu hirak ne’e. Fo hatene deit mos, ema la hanoin kona. Nune’e Timor-oan hatene deit katak sira nia osan iha Banku Federal Amerika ne’eba. Timor-oan iha osan ne’ebe ho montante boot durante periodu ekonomiku tolu ne’e. Maibe saida mak Timor-oan halo ba osan aikameli, osan kafe ho osan minarai ne’ebe boot ne’e?
Osan boot ne’e, Timor-oan ‘lori tuir’ sira ne’ebe mai sosa aikameli ne’e ba sira nia rain hodi sosa hahan, ropa no seluk tan. Sasan hirak ne’e Timor-oan sira lori mai iha Timor hodi han no hatais. Osan aikameli ne’ebe ho montante boot ne’e sai tomak-tomak ba iha rai liur. Osan boot ne’e la sirkula iha Timor. Tanba saida? Osan ne’e ema seluk nian no “laku di negaranya sendiri.” Ne’e duni osan hirak ne’e tenke fila ba “Negara asal.” Razaun seluk, momentu ne’e seidauk iha lider ne’ebe domina manajementu. Lider hanesan fali “penonton” diak ida nebe observa ninia riku-soin ne’e sai ba rai liur no ema seluk maka goza, laos nia populasaun maka goza. Jargon ida hateten “Pemimpin yang baik belum tentu manajer yang baik, tetapi manajer yang baik sudah hampir pasti, dia adalah seorang pemimpin yang baik.” Ita karik seidauk iha manajer diak ida iha tempu ne’eba. Momentu ne’eba seidauk iha hanoin atu kria currency ka mata uang rasik.
Tuir mai, destinu osan kafe ho osan minarai mos la’o tuir osan aikameli. Osan husi periodu tolu ne’e nia destinu hanesan. Riku-soin Timor nebe nakfilak an ba osan tenke sai ba rai liur no ema seluk maka ‘goza’ osan Timor. Sa’ tan osan minarai. Osan ne’e tanba montante boot liu kompara ho osan aikameli ho osan kafe, buat barak maka Timor-oan sosa ho osan ida ne’e, hahu husi sasan ho folin ki’ik to’o aviaun ne’ebe folin boot. Sasan hirak ne’ebe lolos ita produs rasik iha rai laran, tenke sosa iha rai liur. Bee ne’ebe lolos bele kuru iha rai laran, tenke importa husi rai liur. Pauleti (tusuk gigi) buat simple ida ne’ebe lolos Timor-oan bele halo iha rai laran , tenke importa husi rai liur. Buat hirak ne’e hotu halo Timor-oan ne’ebe dezempregu aumenta ba beibeik no tuir mai kiak nafatin.
Solusaun alternativu: Karik Estadu Timor-Leste iha hanoin atu trava riku-soin Timor ba rai liur, hamenus dezempregu, halo sirkulasaun osan iha nia rain rasik, alternativu hirak ne’ebe mensiona tuir mai bele sai konsiderasaun. Alternativu solusaun hirak ne’e maka (1) aplika Emprezaria Publika (EP) ka Badan Usaha Milik Negara (BUMN) ne’ebe bele fo servisu ba ema barak. Area hirak ne’ebe bele sai EP maka hanesan: area agrikultura partikularmente Natar, area fisheries ka perikanan laut, area veternaria ka peternakan, area minarai, no area Bankaria (perbankan). EP iha Area estabilisimentu natar. Natar Suai – Iliomar. Area ida ne’ebe mak merese ba estabilisimentu natar nudar EP mak area natar husi Suai to’o Iliomar. Estadu bele estabelese ida ne’e hodi aseleira ekonomia povu tanba servisu ne’e ema barak maka bele involve. Estadu bele halo mapamentu atu identifika luan area hodi nune’e bele identifika mos sistema irigasaun ne’ebe sei monta ba natar hirak ne’e. Atu estabele sisteme irigasaun, ita persiza atu identifika mos fontes bee ne’ebe sei uza ba irigasaun ba natar. Karik ita persiza bendungan ka dam? Karik persiza bendungan ka dam, ita persiza mos atu identifika fontes bee ba dam no modelu dam ne’ebe sei estabelese. Ita mos persiza atu identifika numeru dams ne’ebe sei estabelese nomos fatin ne’ebe atu estabelese dams ne’e iha ne’ebe deit. Area seluk ne’ebe bele estabelese natar maka Natar Loes – Tunubibi (Maliana). Loes to’o Tunubibi sai mos area ne’ebe bele konsidera nudar area natar ne’ebe boot no bele sai nudar EP. Tanba be’e iha mota Loes ne’e eziste durante tinan ida, Timor-Leste bele estabelese dam hodi halo irigasaun ne’ebe kontinua durante tinan ida tomak. Estabelese natar ne’e deit Timor-oan lubuk ida maka servisu ona no la persiza trata dokumentu hodi buka servisu ba rai liur.
EP iha Area estabilisimentu fisheries ka perikanan laut. Timor-Leste iha tasi ne’ebe luan husi tasi feto to’o tasi mane ho variasaun ikan ho kuantidade ne’ebe maka boot. Timor-Leste bele aplika sistema perikanan nasaun Japaun ne’ebe halo industria ikan iha ró leten. Ró ba kaer ikan dala ida ho pengalengan hafoin hatun iha rai maran. Area ne’e mos bele fo servisu ba ema barak tanba la dun persiza skill ne’ebe maka’as. Ba dahuluk Timor-Leste karik sosa ró rua ne’ebe halo operasaun iha tasi feto no ida seluk iha tasi Mane ho kontrola masimu husi Timor-Leste Marine (F-FDTL). Timor-oan ne’ebe koñesidu ho malnutrisaun tanba ita toba iha hahan leten.
EP iha Area estabilisimentu veternariu ka peternakan. Area potensial ida maka bele sai nudar EP iha Timor-Leste maka area veternariu ka peternakan. Produtu hirak ne’ebe maka bele sai konsiderasaun ba EP maka hanesan susu been karau, na’an karau, na’an manu, na’an fahi no seluk-seluk. Produtu hirak ne’e tenke mos konsidera fatin ne’ebe apropriadu hodi nune’e bele iha produsaun maka’as no kontribui ba kresimentu ekonomia rai laran. Durante ne’e Timor-oan han ‘ayam potong’ husi nasaun seluk tanba ita nain lakohi kria rasik kampu servisu ne’ebe sei produs hahan no kontribui ba ita nia saude rasik.
EP iha Area minarai. Nasaun Malaysia iha Petronas, Indonesia iha Pertamina. Timor-Leste? Timor-Leste to’o ohin loron moris ho osan minarai maibe laiha EP ida ne’ebe hamrik metin hanesan Petronas Malaysia ka Pertamina Indonesia. Timor-oan tenke iha hanoin atu estabelese EP ida iha area fantastiku ida ne’e. EP minarai Timor bele fo naran Petrolmor ka Petroleomor. Area ida ne’e mos sei fo servisu ba ema baarak tanba hahu husi prosesu “minyak mentah” to’o iha “minyak jadi” ho skill ne’ebe oioin. Kekayaan Negara yang menyangkut hajat hidup orang banyak, harus dikelola oleh Negara melalui perusahaan Negara.
EP iha Area Bankaria ka Perbankan. Esperiensia hatudu katak ita nia riku-soin ne’ebe nakfilak an ba osan sai tomak-tomak ba rai liur tanba ita laiha currency ka mata uang. Banku Sentral Timor-Leste laos sai deit fatin rai osan maibe tenke iha hanoin atu estabelese currency ka mata uang. Riku-soin Timor tenke sirkula iha rai laran, hodi nune’e Timor-oan bele goza ho ninia Riku-soin rasik. Sai nai ulun, laos hein ema maka iha ideia. Sai nain ulun tanba ita boot sira iha ideia ne’ebe brilian atu halo nasaun ida ne’e nabilan iha mundu. Ita tomak iha tenke hanoin hodi lolo liman ba malu atu “jadikan di atas bumi seperti di dalam surga.”
Konkluzaun: Iha tempu badak nia laran, tinan 5- 10 mai oin, nia laran ita seidauk iha hanoin atu investe iha rai seluk. Ita focus lai iha rai laran hodi loke kampu servisu ne’ebe ema barak involve liu husi emprezaria Publika (EP) ka Badan Usaha Milik Negara (BUMN). Area lima maka konsidera bele estabelese EP maka Natar (agrikultura), perikanan laut, peternakan, perminyakan ho perbankan. Timor-Leste iha esperansa nabilan iha oin maibe depende ba situasaun ema ne’ebe sei kaer ukun. Timor bele atinji mehi diak hirak ne’e hodi halo Timor-an konfia an ohin no aban bainrua. Timor-Leste nasaun ki’ik, nasaun riku ho ideia, nasaun riku ho matenek, rai lulik ka nasaun santa. Tempu to’o ona atu ita hili ema ida ne’ebe iha ideia brilian, manajer diak, laiha kontaminasaun ba korupsaun, laiha kontaminasaun ba hanehan ema Timor rasik, menjadikan masa lalu sebagai sebuah kenangan indah dan masa depan sebagai sebuah harapan, iha kapasidade atu la’o hamutuk ho povu, sai matadalan diak ba povu, no bele mos la’o husi kotuk atu dudu povu ba oin ho berani mengambil keputusan yang tidak terkenal atu osan Timor sirkula iha nia rain rasik, Timor-oan goza duni nia riku-soin, iha saude diak no goza duni ninia independensia. Viva Timor-oan.
5,374 total views, 3 views today
Bele hare Video Seluk :
Subscribe to Timorpost
