Laútem (timorpost.com) – Tanba hadau malu rate avó bei-ala sira nian iha Munisípiu Laútem, Postu Administrativu Iliomar, área Larisulua, rezulta Carlos da Costa ho Adolfo Ferreira, taa malu.
Tuir informasaun ne’ebé Timor Post asesu husi família balun iha Postu Administrativu Iliomar, área Larisula, Bartolomeu Antonio Pinto, liuhusi telefone, iha Sábadu (08/01), katak sira na’in rua nu’udar família iha bairru laran mak halo konfrontasaun ne’e hodi rezulta to’o sira kanek todan hotu.
“Família ho família, maibé sira rua taa malu, tanba de’it problema hadau malu avó bei-ala sira-nia rate”, nia hateten.
Nia dehan, hafoin sira taa malu, sira kanek todan hotu, tanba ne’e Carlos da Costa, agora asegura ona iha Hospital Nasionál Guido Valadares (HNGV) no Adolfo Ferreira mós halo ona tratamentu iha Hospial Referral Baukau.
“Sira rua nia problema família ho família uma laran halo konfrontasaun, ne’ebé rezulta Adolfo Ferreira nia família na’in-rua mós kanek grave, nune’e mós Carlos da Costa nia família na’in-ida mós hanesan, sira ho kondisaun grave hotu,” nia informa.
Entretantu sidadaun na’in-rua ne’ebé taa malu ne’e, Adolfo Ferreira, nu’udar komunidade bain-bain, maibé Carlos da Costa, nia nu’udar Autoridade Lokál, Xefe Aldeia Larisula. Sira na’in-rua ne’e taa malu iha oras tuku 6:00, iha loron Sesta, 06 fulan Janeiru tinan 2023.
Carlos da Costa, nu’udar Xefe Aldeia, hetan taa husi nia Ulun, Kabun, Liman, Ain sira no Adolfo Ferreira, hetan taa husi nia Ulun.
Alende ne’e ekipa Timor Post koko entrevista família sira seluk, maibé lakohi fó komentáriu, no sira dehan husik Tribunal mak sei hasai desizaun ba problema ne’e.
5,853 total views, 6 views today
