Husi: Luis Pereira S,J
Ita tama ona ba domingo XXVII tempo komun nian. Liturjia domingo ida ne’e nian, konvida ita atu medita no reflete kona ba ita nia fiar no konfiansa iha no ba Naí Maromak.
Notisia sira ikus-ikus ne’e konaba: injustisa social, korupsaun, defamasaun, oho ema, liu-liu abusos sexuais (ikus liu mak notisia amo Belo nian), padre nia mate, ..nst., mesak deít notisia sira ne’ebé ‘doko’ ita nia fiar. Liu-liu tamba kazu sira ne’ebé involve ‘oknum’ igreja nian ne’ebé sai núdar modelo ba ita.
Buat sira ne’e, halo ita kestiona kualidade ita nia fiar, densidade ita nia relasaun ho Naí Maromak no ita nia amizade ho autoridade igreja nian. Iha situasaun hanesan ne’e, ita husu, ita nia fiar bót oinsá?
Discípulo sira fiar iha Jesus-Kristo no lao tuir Nia. Maibé, wainhira sira haré soldado sira hakbesik ba sira iha Jardim Getsemani, sira husik/abandona no halai lakon hotu husi Jesus. Bain-bain, Jesus dehan ba sira katak sira ema fiar kík.
Tamba ne’e, Saun Lukas haktuir katak discípulo sira hakbesik-an ba Jesus no husu ba Nia: Naí, habót ami nia fiar ba!. Ema ne’ebé la hatene no la hatene katak nia la hatene mak ema ne’ebé ita bele dehan beik/bilan. Maibé, ema ne’ebé la hatene no hatene katak nia la hatene mak ema ne’ebé sábio/matenek/kakutak joga.
Discípulo sira konsiente katak sira nia fiar fraku. Sira nakdoko wainhira sira hasoru tentasaun, perigu no ameasas ba sira nia moris. Tamba ne’e, sira preciza tulun Jesus nian. Nuné, sira foti asaun konkreta ida hodi hakbesik-an ba Nia hodi husu atu Nia habót sira nia fiar. Basá, sira hatene katak iha Nia deít no ba Nia deít mak sira tau fiar ba no sira nia fiar bele sai bót ho Nia deit.
Fiar katak adezaun ba Maromak. Relasaun ida ne’ebé ema ida kria ho no iha Naí Maromak. Discípulo sira adere-an ba Jesus-Kristo no nia misaun. Nuné, fiar iha karakteristikas ka kualidades rua: dinamika no haraik-an.
Dinamika tamba nia ‘krese’, muda, iha moris/vida hanesan mustarda musan. Nia opera iha tempo diak no tempo susar nia laran. Nia fo forsa ba ema atu lao iha momento susar sira moris nian. Nia enkoraja no fo naroman iha tempo injustisa sira, pekadu, duvida, konfuzaun no seluk tan.
Laós ne’e deit, maibé, nia mós iha kualidade haraik-an. Basá, nia laran-luak no gratuita. La halo ema foti an. Nia lori ema tau Maromak mak bót liu no iha centro. Tamba ne’e mak, nia fo biban ba milagre akontese. Nia halo buat ne’ebé imposivel sai posivel. Jesus rasik dehan ho Ha’u buat hotu bele deit.
Nuné, mai ita hakbesik-an ba Jesus iha ita nia moris lor-loron, liu-liu momento nakukun ne’ebé doko ita no igreja em jeral hodi husu Jesus habót ita nia fiar. So nuné deit, mak ita bele dehan ho salmista: se ohin, imi rona Naí nia lian, keta taka imi fuan. Amen! (lupersj)
2,622 total views, 3 views today
