ADVERTISEMENT

MENSÁJEN HUSI PREZIDENTE REPÚBLIKA BA ESTADU EMERJÉNSIA DAHITU

Timor Post - Opiniaun
  • Share

Povu doben Timor-Leste

Ho autorizasaun husi Parlamentu Nasional, Prezidente Repúblika deklara estadu emerjénsia dahitu, liuhusi dekretu prezidensial, publika iha Jornal Repúblika, iha 27 outubru 2020.

Ho deklarasaun ida ne’e, Timor-Leste tama iha estadu emerjénsia dahitu.

Ita hatutan dala ida tan tanba Timor-Leste sei hasoru nafatin risku boot enkuantu vírus korona hada’et maka’as hela, husi ema ba ema, iha mundu tomak.

Iha loron ne’ebé Prezidente Repúblika husu autorizasaun husi Parlamentu Nasional atu deklara estadu emerjénsia, númeru ema afetadu no mate husi moras Covid-19 aas tebes iha mundu.

Tuir Organizasaun Mundial Saúde, iha loron 26 de outubro 2020, ema moras iha mundu tomak besik ona millaun haat nulu. Liu millaun ida mak mate ona ho moras Covid-19.

Ita preokupa liuliu ho situasaun iha ita-nia rai viziñu, liuliu ho Indonézia, ne’ebé iha fronteira-rai ho ita.

Kazu pozitivu ida tan rejista iha Timor-Leste, tama-mai husi fronteira-rai ho Indonesia maibé pesoal saúde kontrola hela iha fatin-izolamentu.

Númeru kazu konfirmadu Covid-19, iha provínsia tolu nulu resin haat Indonézia nian, inklui iha Nusa Tengara Timur, aas tebes. Hamutuk besik rihun atus haat ona mak pozitivu no ema liu rihun sanulu resin tolu mak mate ona.

Iha fulan outubru, moras covid-19 sa’e maka’as tebes iha Indonézia. Iha loron 25 outubru de’it, ema liu rihun tolu atus hitu mak hetan moras ne’e no kuazi atus ida mak mate iha Indonézia.

Iha Nusa Tengara Timur de’it, iha ona kazu konfirmadu atus neen lima nulu resin rua.

Povu doben Timor-Leste

Ita-nia populasaun kiik tebes. Ema mak ita-nia rikusoin boot liu.

Ita-nia país la iha meiu atu kontrola bainhira Covid-19 da’et ona ba komunidade.

Ita lakoi moras ne’e da’et ba ema ida! Ita lakoi lakon ema ida tanba Covid-19!

Enkuantu matenek-nain sira seidauk deskobre vasina, atu ita bele proteje-an husi vírus korona, Timor-Leste iha de’it dalan ida:

hatutan estadu emerjénsia hodi bele aplika regras kuarentena iha pontus entrada.

Tanba ita hatuur kuarentena ba ema hothotu mai husi rai-li’ur mak Covid-19 seidauk hada’et ba komunidade.

Biar Estadu emerjénsia suspende ka limita direitus ema nian, ita hotu tenke simu. Ho Estadu emerjénsia, ita defende sidadaun nia direitu boot liu:

direitu ba vida no moris saudável babeibeik.

Maluk sira

Ita tenki kuidadu-an nafatin!.

Atu kuidadu-an no proteje família no komunidade husi Covid-19, ida-idak tenke kumpre medida sira tuir mai:

– fase liman ho sabaun, molok tama loja no fatin públiku no molok han;
– obrigatóriu uza máskara bainhira hetan malu ho ema iha eventu kultural, relijiozu, kazamentu no seluk. Tenke uza mós máskara bainhira bá merkadu, loja no supermerkadu ka fatin ho ema.
– hadook-an malu metru ida ho balun husi ema ne’ebé la’ós família ka la hela hamutuk.

Ita hotu tenke haktuir regra sira fó-sai iha mensájen ida ne’e atu ita hothotu hadook-an husi Covid-19 no proteje malu.

Estadu emerjénsia hahú filafali iha Timor-Leste, husi loron 4 novembru no sei ramata iha 3 dezembru.

Husu ba maluk sira atu haktuir Governu ninia medidas hodi ita hotu taka dalan ba Covid-19 .

Husu nafatin apoiu husi komunidade, liuliu hela besik fronteira-rai, atu ajuda autoridade lokal atu la husik ema tama husi dalan ilegal.

Prezidente Repúblika konta ho apoiu husi sidadaun ida-idak no hothotu.

Ita-nia saúde iha ita-nia liman!

Obrigadu!

 992 total views,  3 views today

Oinsa Ita nia Reaksaun iha Notisia Nee?
Like
Love
Haha
Wow
Sad
Angry
You have reacted on “MENSÁJEN HUSI PREZIDENTE REPÚBLIKA BA ESTADU EM…” A few seconds ago

Lee Mós :
Em Memória Dom Basilio: “Bomba nakfera iha Aceh ema la rona, Daun monu iha Timor, Mundu Hakfodak”

Bele hare Video Seluk :
  • Share
ADVERTISEMENT
SCROLL FILA BA NOTISIA

Notisia Timorpost Seluk


Komentariu :
Timorpost.com. Respeita tebes Ita Nia opiniaun. Laran luak no uza etika bainhira hatoo opiniaun. Opiniaun iha Ita Nia responsabilidsde, tuir lei ITE.

Varanda
Kategoria
Video
Buka
Watch
Facebook
error:
Simu Notifikasaun Hosi Timor Post Online! OK No