Dili (timorpost.com) — Grupu Kulinária 16 hosi Munisípiu neen, tuir kompetisaun prepara menu Ai-han produtu lokál, ne’ebé organiza hosi Ministériu Turizmu, Komérsiu no Indústria.
Iha abertura ba feira nasionál ne’e, Vise Ministru Turizmu Komérsiu no Indústria (MTKI), Domingos Antonunes Lopes, hatete kompetisaun ba grupu Kulinária iha eventu feira nasionál hetan orientasaun hosi Xefe Governu.
Nia afirma, Primeiru Ministru, Taur Matan Ruak, hakarak promove setór privadu, emprezáriu sira, grupu Kooperativa no grupu kulinária sira atu hatudu, ne’ebé durante ne’e sai hanesan fonte finanseiru.
“Eventu ida ne’e hetan orietasaun mai hosi Primeiru Ministru, Taur Matan Ruak, husu setór privadu sira, kooperativa sira, grupu kulinária no produtór sira atu hatudu ita boot sira-nia produtu ne’ebé durante ita boot sira produs atu buka rendimentu no kria empregu”, nia diskursu iha abertura feira nasionál.
Governu ida ne’e fó atensaun hela ba grupu kulinária sira atu dezenvolve an, tanba ne’e iha feira ne’e ho tema “atu promove produtu lokál nune’e bele atrai turista sira mai vizita Timor-Leste”.
“Ita boot sira haree tema ita-nia atividade atu promove produtus lokál ba Turizmu, atu promove turizmu iha ita-nia rain”, nia hateten.
Governante ne’e subliña, kulinária ne’e komponente importante ida hosi dezenvolvimentu turizmu iha nasaun ida ne’e, tanba ne’e maka presiza atu dezenvolve di’ak liu iha tempu oin mai.
“Ha’u atu hatete ba ita boot sira katak, kulinária ne’e hanesan komponente importante ida ba Turizmu, esperensia turizmu nian”, tenik Domingos.
Tanba ne’e, membru Governu ne’e mós husu ba grupu Kulinária no empreza privadu sira atu hahú ona atu halo negósiu ba oin, nune’e bele hetan rendementu hosi produtu hirak ne’ebé produs, liuliu ai-han lokál ne’ebé produs.
“Ha’u hanoin kompetisaun ida ne’e di’ak, ha’u foin partisipa kompetisaun kulinária ne’e, mai ita hotu-hotu tuir nia prosesu, la’ós de’it atu buka manan na’in, más buka hahán ida di’ak liu ba konsumidor sira, liuliu turista sei lori osan mai ita”, governante ne’e esplika.
Tuir observasaun kompetisaun kulinária produtu hahán lokál, ka tradisionál ne’e, hetan partisipasaun hosi grupu 16, grupu rua mai hosi Munisípiu Ermera, grupu rua mai hosi Likisá, grupu ida mai hosi Baukau, grupu ida mai hosi Vikeke, grupu rua mai hosi Manatutu no Dili rasik iha grupu ualu.
Produtu ai-han lokál sira ne’ebé grupu sira aprezenta iha kompetisaun ne’e, maka hanesan, tein foos rai, tein foos rai ho fore, etu sedok, modo raba-raba, katupa, na’an manu timor, saboko ikan, ikan tukir, na’an tukir, etu tukir ho na’an, talas, fehuk, akar, hudi tasak, ai-dila tasak no produtu lokál sira seluk.
1,946 total views, 3 views today
Bele hare Video Seluk :
Subscribe to Timorpost
