DILI (timorpost.com) — Kazu deskonfia membru Polisia Nasionál Timor-Leste (PNTL) Munisípiu Bobonaru, halo agresaun fíziku hasoru labarik menoridade ho inisiál C, Komandu Jerál PNTL, Komisáriu Faustino da Costa, hatete laiha keixa hosi Vítima ho família.
Komandante Jerál PNTL, Komisáriu Polisia Faustino da Costa, informa kazu Bobonaru ne’e akontese iha loron Tersa kalan (27/12), Polisia Nasionál Timor-Leste (PNTL), liuhusi Departamentu Diresaun Justisa Dixiplina, identifika ona membru PNTL Munisipiu Bobonaru ne’ebé momentu ne’ebá ba halo atuasaun ba joven sira ne’ebé sunu fugetis iha fatin refere.
“Kazu Bobonaru ne’e, ita identifika ona membru ne’ebé momentu ba halo atuasaun ba joven sira ne’ebé sunu fugestis iha area eis rezidénsia Bispu nian, ita identifika ona membru PNTL iha ekipa rua, mais prosesu la’o mak Komandu Jerál PNTL haree,” nia hateten hafoin partisipa tomada de posse Komandante PNTL Munisípiu Dili, iha Komandu PNTL, Kaikoli, Kuarta (04/12).
Nia dehan, kona-ba kazu Bobonaru ne’e, prosesu sei la’o, tanba ekipa Departamentu Diresaun Justisa Dixiplina, mak dezloka ba iha Munisípiu Bobonaru hodi halo investigasaun ba kazu ida ne’e.
“Família ho vítima naran inisiál C, to’o agora seidauk mai hato’o keixa ba iha Komandu PNTL Bobonaru, maibé liuhusi media lider partidu polítiku sira ne’e barak demais, maibé prosesu la’o mak ita haree,” nia dehan.
Alende ne’e Komisáriu Faustino, hatete Kazu Bobonaru ne’e, halai liu ba media, mais keixa ofisiál atu bele rejistu ba Ministériu Públiku ne’e laiha, depende ekipa husi Departamentu Diresaun Justisa Dixiplina, halo investigasaun.
Antes ne’e, Komandante Polisia Nasionál Timor-Leste (PNT) Munisípiu Bobonaru, Superintendente Polisia Antonio Mauluta, rejeita nia membru halo agresaun fíziku hasoru labarik minoriedade ho inisiál C iha Munisípiu Bobonaru.
“Relasiona ho membru Nain-tolu husi Komandu PNTL, deskonfia katak sira halo agresaun fíziku hasoru menoriedade ho inisial C, ha’u la bele dehan, ida ne’e ha’u-nia membru sira mak halo ka lae, maibé depois ita haree iha prosesu hafoin ita hatene,” nia hateten iha Komandu Jerál PNTL, Kaikoli, Kuarta (28/12).
Maibé, nia hatete iha momentu ne’ebá parte husi ekipa komandu PNTL Bobonaru nia halo patrolia, hafoin hetan kontaktu husi Amu Pároku Maliana nian, katak joven sira sunu fugetis halo padre, madre no komunidade sira deskansa la di’ak, tanba ne’e membru PNTL husi komandu Bobonaru ba iha fatin refere, hodi halo prevensaun.
Nia dehan, tuir informasaun ne’ebé nia parte simu, katak depois patrolia husi komandu PNTL to’o iha fatin ne’ebá, joven sira haree no halai sees husi fatin ne’e, labarik Menoridade ne’e halai mak monu ba fatuk, laiha polisia ida mak halo agresaun fíziku.
“Maibé, informa ne’ebé espalla iha media sosiál katak, ha’u-nia membru na’in-tolu mak halo agresaun fíziku, tanba ne’e ami buka tuir ema ne’ebé mak halo publikasaun iha media sosiál, ami hetan, ema nee Bobonaru nian,” nia dehan.
“Ita kontaktu ona ema ne’ebé halo publikasaun iha media sosiál, tanba iha ne’ebá nia hatete ha’u katak, Komandante Munisípiu Bobonaru ne’e toba dukur la haree ba situasaun ida ne’e, tanba ne’e ami hetan ona ema ne’e”, nia afirma.
Ikus nia dehan, labarik menoridade ne’ebé deskonfia hetan agresaun fíziku ne’e, daudaun iha Ospitál hodi halo tratamentu.
2,281 total views, 3 views today
Bele hare Video Seluk :
Subscribe to Timorpost
