DILI, (timorpost.com) — Komandante Unidade Polísia Militár (PM), Tenente Koronel, Abel da Costa Xavier “Niki”, hatete atu garante estabilidade iha rai-laran FALINTIL Forsa Defeza Timor-Leste (F-FDTL) liuhosi Unidade PM prontu fó apoiu ba Polísia Nasionál Timor-Leste (PNTL) iha kualker tempu.
“Ami núnka husik malu, ne’ebé povu labele hanoin dehan PM ho Polísia ne’e la kompak, alin oan sira maka la kompak, ami komandu ne’e kompak hela, ba interese estadu, garantia seguransa defeza estadu Timor-Leste ami sempre fó apoiu ba malu”, Komandante Unidade Polísia Militar, Tenente Koronel, Abeli da Costa Xavier “Niki”, informa ba Timor Post iha nia kna’ar fatin, edifísiu PM Kintál Boot – Dili, Sábadu,(25/11/2023).
Nia hatutan, Polísia Militár fó apoiu ba maluk PNTL, ne’e tuir nesesidade, bainhira hetan orientasaun husi Xefe Estadu Maior Jenerál F-FDTL, iha kualker tempu PM prontu fó apoiu ba PNTL hodi garantia estabilidade seguransa iha rai-laran.
Esforsu lubuk ida ne’ebé Komandu PM F-FDTL ho Komandu PNTL, liuliu Unidade Espesiál Polísia (UEP), Unidade Polísia Marítima (UMP), Unidade Polísia Fronteira (UMPF) halo mak sempre koordenasaun ba malu, servisu hamutuk ba kestaun estabilidade seguransa ba iha teritória Timor-Leste.
“Laiha orientasaun mós ami sempre servisu hamutuk nafatin, Polísia Militár ho maluk PNTL husi munisípiu Dili, liuliu Polísia Espesial, ne’e ami kamarada, ami parséiru di’ak, ami sempre kontaktu malu, atu garantia seguransa iha teritóriu tomak, ne’e ami instituisaun rua ne’e laiha dúvida”, Komandante Niki esplika.
Tuir nia, iha nasaun ida defeza no seguransa ne’e ida de’it, laiha tan defeza no seguransa seluk, defeza mak F-FDTL no Polísia Militár nu’udar unidade ida husi instituisaun F-FDTL atu asegura lei no orden, bainhira PNTL presiza PM prontu fó apoiu.(*)
1,566 total views, 9 views today
Bele hare Video Seluk :
Subscribe to Timorpost
