Díli (timorpost.com) – Relasiona ho insendiu ne’ebé akontese hori-bairua kalan oras tuku 11:00, iha merkadu Taibesi rezulta ahi han uma hamutuk 53 ho xefe família atus resin sasán uma laran la konsege salva.
Tanba ne’e Autoriedade Munisipiu Dili (AMD), apoiu hahán foos, mina, Supermie, rinsu, sabaun, no buat seluk hodi bele ajuda vítima sira-nia sofrimentu hodi bele uza ba nesesidade loron-loron nian.
“Ami apoiu foos mina, masin, supermie, dose, biskuit, bee, susu been, roupa no buat seluk tan, hodi nune’e vítima sira bele han hodi aguenta bainhira sei hela iha fatin refujiadu ne’ebé okupa fatin veteranu nian iha Taibesi”, dehan xefe departamentu servisu jestaun merkadu Munisípiu Dili, Gaspar da Silva, ba Timor Post iha merkadu Taibesi, Sábadu (24/12).
Nia dehan, apoiu ida ne’e ho objetivu atu hakmaan vítima sira-nia sofrimentu hodi hein fali ajuda husi parte seluk, karik iha ema ruma bele ajuda sira iha nesesidade báziku hanesan ai-han no buat seluk tuir kapasidade no kbiit ne’ebé sira iha.
Portantu munisípiu Dili, nafatin prontu apoiu ai-han ba komunidade ne’ebé afeta ba dezastre saida de’it, atu nune’e bele hakmaan vítima sira ne’ebé terus bainhira sira sei iha fatin refujidu.
Tuir dadus vítima ne’ebé afeta ba dezastre insendiu uma-kain hamutuk 53 ho xefe família hamutuk neen nulu resin haat (64), maka sofre ba dezastre insendiu ne’ebé akontese iha loron rua liubá.
Enkuantu vítima sira agora hela provizóriu iha edifísiu veteranu nian iha Taibesi, hodi hein bainhira sira bele evakua fali ba iha fatin seluk hodi kontinua fali sira-nia atividade negósiu hanesan bai-bain.
Iha fatin hanesan, vítima insendiu Pascoela Tilman, agradese ba Autoridade Munisípiu Dili, ne’ebé apoiu ona ai-han hanesan fos, mina, masin, supermie, susu been, biscuit, bee, hodi ajuda sira aguenta iha loron hirak nia laran.
Nia dehan, maski sira sente triste tanba lakon uma no lakon sasán uma laran la salva husi dezastre ne’ebé akontese, maibé sira agradese tanba Governu bele apoiu hahán ba sira hodi tulun sira iha loron hira nia laran.
Nia dehan, sasán uma laran la salva hotu maibé ida ne’e dezastre la espera maski triste maibé akontese ona tenke simu realidade ne’e.
1,577 total views, 6 views today
Bele hare Video Seluk :
Subscribe to Timorpost
