Dili (timorpost.com) – Amu selebrante misa natal, Sábadu kalan (24/12), iha estasaun misionáriu nossa Senhora das Graças Lisibutak Manleuana, Padre José Sequeira, hatete Natal hanesan prezente husi Maromak ne’ebé haruka nia oan mane Jesus mai moris iha ema ida-idak nia leet.
“Ita selebra natal hanesan prezente furak husi Maromak ne’ebé haruka nia oan mane Jesus kosok-oan mai moris iha mundu ida ne’e lori pas, hakmatek ba ema ida-idak hodi hetan grasa isin di’ak”, omilia padre José.
Na’i Lulik ne’e dehan, natal hanesan tempu furak ba ema hotu hodi prepara an ho fuan no laran mós hodi simu Jesus kosok oan ne’ebé moris iha bibi luhan iha rai Belem hodi hatudu ba mundu katak Jesus maka Mesias.
Bibi atan ne’e esplika, maromak fó nia oan mane mesak mai moris iha mundu ida ne’e hodi kasu ema hotu nia sala, tanba ne’e husu ba ema atu hadomi malu no rona malu, perdua malu ho fuan no laran mós hodi simu Jesus kosok oan mai moris iha ema ida-idak nia fuan.
Alende ne’e, nia hatete, natal hanesan oportunidade di’ak ba família hotu atu halibur hamutuk ho nia oan sira ho fuan no laran moos hodi simu Jesus kosok-oan lori pas, hakmatek, armonia ba uma-kain ida-idak hodi hetan salvasaun no grasa isin di’ak.
Tanba ne’e husu, sarani hotu atu kria pas, hakmatek iha sosiedade no iha Timor-Leste, hodi halo reflesaun prepara ho fuan no laran moos hodi hein tinan foun lori dame no lori domin.
Natal hanesan presente espesiál husi Maromak liuhusi presenza kosok oan ne’ebé mai moris iha ema ida-idak nia fuan hodi hetan grasa isin di’ak, domin no vida naruk tanba ne’e husu sarani nafatin fiar ba Maromak hodi hetán salvasaun.
1,890 total views, 3 views today
Bele hare Video Seluk :