COVALIMA (Timor-Leste)-Prezidénsia Repúblika entrega apoiu nesesidade bázika ba komunidade afetadu husi inundasaun no kalamidade provokadu husi udan-boot, ne’ebé akontese iha loron 30 fulan-Juñu to’o inísiu fulan-Jullu iha Suai, Munisípiu Covalima.
Tuir Xefe Kaza Sivíl ne’ebé entrega direta apoiu Prezidénsia Repúblika nian ba vítima inundasaun sira ne’ebé oras ne’e evakua iha Eskola Sekundária Jerál Públiku Suai, hafoin rona tiha notísia inundasaun iha Suai, Viqueque, Lospalos no fatin sira seluk iha territóriu laran, Prezidente Repúblika orienta kedas atu koordena no mobiliza rekursu hotu ne’ebé disponível, hodi tulun komunidade sira ne’ebé afetadu.
“Ida ne’e hanesan primeiru kontaktus. Fó mós apoiu inisiais uitoan ne’ebé ke bele tulun maibé mós iha Prezidénsia (Repúblika) halo hela preparasaun, enkontru ho amigus sira, emprezáriu sira, atu haree to’ok dalan ruma bele tulun karik, ita organiza didi’ak”, esplika Xefe Kaza Sivíl bainhira entrega apoiu Prezidénsia Repúblika ba komunidade afetadu sira ho prezensa autoridade Sivíl no militár sira Munisípiu Covalima nian, iha Eskola Sekundáriu Jerál Públiku Suai.
“Prezidente nia mensajen katak haree liu, identifika “os mais afetados, as vítimas humanas”. (…) Portantu, la ko’alia infraestrutura más nia hakarak vítimas humanas ne’ebé ke afeta diretamente husi kalaminidade ida ne’e, ita atu identifika”, subliña Xefe Kaza Sivíl, ne’ebé akresenta Prezidente José Ramos-Horta, hakarak haree rasik kondisaun komunidade sira ne’ebé afetadu, maibé tanba iha ajenda servisu ida iha Kuartél Jenerál F-FDTL iha loron 4 fulan-Jullu, nune’e programa vizita sei halo fali iha tempu besik.
Tuir dadus provizóriu Administrasaun Munisípiu Covalima nian, populasaun hamutuk 109 ho Xefe família hamutuk 35 mak afetadu husi inundasaun ne’ebé akontese iha Aldeia Akar-Laran, Lo’o no Loro, iha Suku Suai Loro, Postu Administrativu Suai Vila.
Autoridade Munisipál harii ona “Komisaun Dezastre Munisípiu Covalima” hodi tau-matan ba komunidade afetadu sira husi inundasaun.
3,383 total views, 3 views today
Bele hare Video Seluk :
Subscribe to Timorpost
