DILI (timorpost.com) — Polisia Nasionál Timor-Leste (PNTL) liuhusi Komandu Munisípiu Kovalima, detein suspeitu na’in-8, tanba deskonfia envolve iha konfrontu ne’ebé akontese iha suku Tashilin, postu administrative Zumalai, munisípiu Covalima.
Komandante Jera PNTL, Komisáriu Jerál Polisia, Henrique da Costa, hatete iha loron 26 fulan Maiu ne’e, iha area Zumalai nian, hafoin insidente ne’e akontese, parte patrullamentu husi munisípiu Kovalima nian, espesialmete post eskuadra Zumalai, ba atende no hetan apoiu husi parte Unidade Espesiál no BOB sira iha ne’ebá.
Konfrontu ne’e rezulta komunidade nian sasán balun hetan estragu, hanesan motorizada, parabola, kadeira, odamatan uma nian, inklui ema balun mós kanek, tanba ne’e iha loron Kinta (01/06), polisia konsege foti ona suspeitu hamutuk na’in-8, agora daudaun iha ona komandu munisípiu Kovalima, para bele kontinua prosesu.
“Kuandu sira la aprezenta aan mós ita sei promove, para hetan mandatu detensaun hodi halo kapturasaun. Grupu ne’ebé mak envolve ne’e, mai ho istória katak husi arte marsiál PSHT, ida tan fila fali mak husi arte marsiál KORKA, indivíduu balun ne’ebé mak uluk treinu ida ne’e nian, sira mak ataka malu”, nia informa ba jornalista sira, iha Kuartél Jerál PNTL Kaikoli, Sesta (02/06).
Nia dehan, halo ona komunikasaun ho Komisaun Reguladora Arte Marsiál no mós lider organizasaun nian, para atu toma nota ka toma atensaun, tanba matenek ne’ebé hetan liuhusi treinu, uza tuir dalan, la’ós uza fali treinu hodi halo problema no krime, para kria instabilidade iha nasaun ida ne’e.
Antes ne’e, Komandante PNTL Munisípiu Kovalima, Superintendente Basílio de Jesus, hatete konfrontu entre grupu arte marsiál ne’e, husi parte seguransa halo kedan atuasaun. Grupu arte marsiál husi aldeia Bora Ikun suku Tashilin, estraga komunidade nia sasán hanesan motorizada, uma no seluk tan.
“Iha tempu ne’ebá, ha’u hanesan komandante munisípiu, lidera ekipa hodi atua kedas situasaun ne’e, suspeitu sira-ne’e ita identifika ona hamutuk na’in-22, polísia kontinua buka suspeitu sira seluk”, nia relata.
Nia konsidera asaun ne’ebé membru grupu arte marsiál sira halo, nu’udar asaun brutalizmu no krime, entaun ema hotu tenke moris iha lei nia okos, atu nune’e polisia submete prosesu hotu ba Ministériu Públiku, hanesan na’in ba prosesu judisiál.
2,769 total views, 9 views today
Bele hare Video Seluk :
Subscribe to Timorpost
