DILI (timorpost.com) – Polisa Nasionál Timor-Leste (PNTL), sei halo alterasaun ba kurríkulu iha sentru formasaun akademia Polisia, tanba durante ne’e adopta nasaun seluk nian.
Komandante Jerál Polisia Nasionál Timor-Leste (PNTL), Komisáriu Faustino da costa, hatete PNTL idade halo tinan 22 ona, tanba ne’e kurríkulu ne’ebé iha presiza ajusta, tanba organika de’it PNTL muda dala tolu ona, entaun presiza altera mos kurríkulu sentru formasaun iha Akademia.
“Ohin ita halo semináriu nasionál ne’e, oinsá atu altera kurríkulu sentru formasaun iha akademia, ida ne’e mak ohin ita halo no konvida komadante sira hotu, atu fó ideia,” nia hateten hafoin semináriu iha sentru formasaun akademia, Komoro, Sesta (25/11).
Nia dehan, Komandu Jerál nia intesaun mak ida ne’e, orienta ona parte sentru formasaun oinsá atu halo alterasaun ba kurríkulu sentru formasaun iha akademia, antes atu halo alteraun, maibé iha difikuldade kona-ba pandemia entaun la konsege halo alterasaun, tanba ne’e ohin mak foin halo abertutura ba ida ne’e.
“Ohin ita halo abertura ba Semináriu, para depois komandante sira bele fó nia ideia, hanesan ohin ha’u hatete Timor-Leste agora ita hola parte ona ba ASEAN, maibé ita mós nafatin kontinua partisipa iha atividade altu nivel sira iha rejiaun Pasífiku nian, entaun kurríkulu ne’ebé ita iha, katak lá’os haree de’it ba futuru Timor-Leste nian seguru, maibé seguru mós ba ita-nia viziñu nian,” nia afirma.
Alende ne’e nia dehan, formasaun ne’e buat tolu de’it, formasaun bázika no kontinua formasaun no mós formasaun espesializadas.
Iha Biban ne’e, Komandante Sentru Formasaun Polisia (SFP), Superintendente Arquiminio Ramos, hatete atividade ohin halo semináriu nasionál, atu halo alteraun ba kurríkulu sentru formasaun iha akademia, tanba tinan barak sira adopta de’it kurríkulu nasaun seluk nian.
Nia konta, hahú iha tinan 2000, Kurríkulu ONU nian no iha tinan 2004 Kurríkulu Australia nian no to’o tinan 2006 mosu krize no hahú formasaun iha 2011 mai ne’e ho kurríkulu GNR nian.
“Tanba ne’e, ohin ita halo atividade semináriu ne’e, atu konsulta ho komandante sira ne’ebé durante akompaña formadór sira to’o gradua, oinsá sira observa ba ida no fó hanoin ruma, atu mellora liu ita-nia kurríkulu ne’ebé idade 22,” nia dehan.
Tanba ne’e mak presiza iha kurríkulu rasik, para aban-bainrua ne’e la bele dun, tanba uluk kurríkulu ONU nian mak Polisia sai hanesan ne’e, ka kurríkulu Australia nian mak sai hanesan ne’e ou kurríkulu GNR nian mak Polisia sai hanesan ne’e, tanba ne’e presiza iha kurríkulu rasik.
“Ita-nia esperansa ba kurríkulu foun, Polisia ne’ebé ita-nia Estadu hakarak no Polisia ne’ebé ita-nia povu hakarak, tuir espetativa Povu nian,” nia hakotu.
1,004 total views, 3 views today
