DILI (timorpost.com) – Primeiru Ministru (PM) Taur Matan Ruak, kongratula komandu forsa rua hanesan Polisia Nasionál Timor-Leste (PNTL) no Falintil Forsa Defeza Timor-leste (F-FDTL), tanba iha koordenasaun di’ak durante kampaña to’o iha eleisaun parlamentár.
Vise-Ministru Interior, Antonio Armindo, hala’o enkontru semanál ho PM Taur Matan Ruak, iha eskritóriu ofisial Palasiu Governu, hodi atualiza servisu Ministériu Interior nian liuliu liga ba situasaun seguransa rai laran durante períodu Eleisaun Parlamentár (Elpar) inklui serbisu PNTL nian hodi mantein estabilidade rai laran.
“Bazeia ba oráriu semanál, ha’u mai hasoru Sua Exelénsia Primeiru-Ministru atu informa kona-ba situasaun jerál iha rai laran hahú kedas husi kampaña eleitorál mai to’o Eleisaun Parlamentár,” Antonio Armindo hateten hafoin remata enkontru ne’e iha Palasiu Governu, Kinta (25/05).
Tuir nia, situasaun jerál agora la’o kontroladú mezmu problema ki’ik oan ne’ebé akontese maibé forsa rua nasaun nian mantein nafatin seguransa ba povu tomak no garante nafatin estabilidade nasionál iha munisípiu 13 inklui Rejiaun Autónomu Enklave Oe-Cuse Ambeno (RAEOA).
“Hanesan ita hotu hatene katak buat hotu la’o hakmatek kompara ho tinan hirak liubá maski iha kazu ki’ik oan ne’ebé mak akontese, maibé ita nia seguransa servisu sekreta hosi SIP, Makikit, J2 no SNI halo kedas atuasaun. PM mós kongratula Komandu Jerál forsa rua tanba iha koordenasaun seguransa entre Polisia Nasionál Timor-Leste (PNTL) no Forsa Defeza Timor-Leste (F-FDTL) durante períodu Eleisaun Parlamentár,” nia subliña.
Iha okaziaun ne’e, Antonio Armindo konvida ema hotu atu fó apoiu ba IX Governu hodi hala’o nia programa tuir promesa ne’ebé hato’o ona ba povu.
“Ha’u konvida joven sira katak, ita maka na’in ba rai ida ne’e tanba ne’e mai hamutuk apoiu ita nia ho forsa rua ne’e hodi mantein nafatin pozisaun hodi asegura territóriu Timor laran tomak,” nia hateten.
Tempu to’o ona atu hakribi violénsia tanba ema hotu hakarak hakmatek, hodi goza liberdade ne’ebé hatuur ona iha lei inan. Husu ba sidadaun Timor oan tomak, atu fó oportunidade ba Governu foun atu hala’o nia programa tuir promesa ne’ebé hala’o ona ba povu.
1,535 total views, 6 views today
![Like](https://timorpost.com/wp-content/plugins/36/public/assets/img/reactions/like.gif)
![Love](https://timorpost.com/wp-content/plugins/36/public/assets/img/reactions/love.gif)
![Haha](https://timorpost.com/wp-content/plugins/36/public/assets/img/reactions/haha.gif)
![Wow](https://timorpost.com/wp-content/plugins/36/public/assets/img/reactions/wow.gif)
![Sad](https://timorpost.com/wp-content/plugins/36/public/assets/img/reactions/sad.gif)
![Angry](https://timorpost.com/wp-content/plugins/36/public/assets/img/reactions/angry.gif)
![PM Taur Kongratula Komandu Forsa Rua](https://timorpost.com/wp-content/uploads/2023/05/vsmi.jpg)
Bele hare Video Seluk :
![loading](https://timorpost.com/wp-content/plugins/ytuples/images/gallery-page-loader.gif)
![play](https://timorpost.com/wp-content/plugins/ytuples/images/playhover.png)
![play](https://timorpost.com/wp-content/plugins/ytuples/images/playhover.png)
![play](https://timorpost.com/wp-content/plugins/ytuples/images/playhover.png)
![loading](https://timorpost.com/wp-content/plugins/ytuples/images/gallery-page-loader.gif)