DILI (pimorpost.com) – Komandu Polisia Nasionál Timor-Leste (PNTL) Munisípiu Dili, liberta ona estudante manifestante Defisiente na’in-13, hafoin envolve iha Manifestasaun kontra Parlamentu Nasionál, kona-ba Sosa karreta ho Laptop ba Deputadu foun sira.
Komandante PNTL Munisípiu Dili, Superintendente Xefe Polisia Henrique da Costa, hatete horisehik sira foti ema nain-39, hafoin envolve iha Manifestasaun kontra Parlamentu Nasionál, atu Sosa karreta ho Laptop ba deputadu sira.
“Maibé, ita liberta ona ema na’in-13, tanba sira defisiente matan nian no sira la hatene buat ida, tanba ne’e ita bele kontinua sira-nia prosesu, maibé hela na’in-26 mak ita asegura iha komandu Munisípiu Dili,” nia hato’o lia hirak ne’e ba jornalista sira iha nia knaar fatin Kaikoli, Tersa (15/11).
Nia esplika, nain-26 ne’e envolve iha Manifestasaun kontra Parlamentu Nasionál, Sosa karreta ho Laptop, sira-nia parte sei haruka autos ba iha Ministériu Públiku (MP), hafoin hein orientasaun husi Ministériu Públiku.
“Orasida ita aprezenta auto ne’e ba iha Ministériu Públiku, depois Ministériu Públiku mak deside, tanba ita iha 12 ho 48 oras de tempu, mak iha ne’ebá bele haree, tanba ne’e mak orasida ita sei aprezenta ba iha Ministériu Públiku, para depois ita hein orientasaun husi sira,” nia konta.
Alende ne’e nia dehan, horisehik Purvolta de 11:00, dadeer, Polisia Nasionál Timor-Leste, espesialmente, Komandu Munisípiu Dili, apoiu másimu Batallaun Orden Publika no PNTL halo atuasaun ba iha alin estudante hirak ne’ebé hala’o Manifestasaun ka demonstrasaun iha resintu UNTL nian.
“Ita hatene katak, lei númeru 1/2006 nian, kona-ba lei demonstrasaun nian, bandu atu la bele halo Manifestasaun iha fatin hirak ne’ebé sai hanesan fatin importante, Nune’e mós la bele menus husi 100 Metru, entaun ita implementa ida ne’e,” nia dehan.
Nia esplika, molok horisehik PNTL atu foti Estudante sira ne’ebé hamahan-an iha Aliansa Maubere Nasionál (AMB), parte PNTL halo uluk aviza, atu nune’e sira husik fatin ne’e, maibé sira la koopera.
“Ita aviza dala tolu, atu sira husik fatin, maibé sira la koopera, entaun ita foti medida atu nune’e lori mai iha edifísiu Komandu PNTL Munisípiu Dili nian, para nune’e halo prosesu,” nia dehan.
Nune’e mós nia dehan, horisehik molok PNTL halo atuasaun no iha koordenasaun no hetan mós orientasaun husi prokuradór tolu, mak foin halo medida ba ida ne’e.
“Ami-nia atuasaun iha horisehik ne’e, nivel aproximasaun de’it, ita aviza depois sira la koopera, depois ita bolu ba sa’e karreta, mais horisehik ita la uza forsa, atu halo atuasaun iha fatin refere,” nia hakotu.
2,049 total views, 9 views today
![Like](https://timorpost.com/wp-content/plugins/36/public/assets/img/reactions/like.gif)
![Love](https://timorpost.com/wp-content/plugins/36/public/assets/img/reactions/love.gif)
![Haha](https://timorpost.com/wp-content/plugins/36/public/assets/img/reactions/haha.gif)
![Wow](https://timorpost.com/wp-content/plugins/36/public/assets/img/reactions/wow.gif)
![Sad](https://timorpost.com/wp-content/plugins/36/public/assets/img/reactions/sad.gif)
![Angry](https://timorpost.com/wp-content/plugins/36/public/assets/img/reactions/angry.gif)
![PNTL Liberta Ona Manifestante Defisiente Na’in-13](https://timorpost.com/wp-content/uploads/2022/11/Henrique-da-Costa.jpg)
Bele hare Video Seluk :
![loading](https://timorpost.com/wp-content/plugins/ytuples/images/gallery-page-loader.gif)
![play](https://timorpost.com/wp-content/plugins/ytuples/images/playhover.png)
![play](https://timorpost.com/wp-content/plugins/ytuples/images/playhover.png)
![play](https://timorpost.com/wp-content/plugins/ytuples/images/playhover.png)
![loading](https://timorpost.com/wp-content/plugins/ytuples/images/gallery-page-loader.gif)