DILI (timorpost.com) – Atu halo atendimentu ba kazu asidente tarde, Polísia Nasionál Munisípiu Dili (PNTL), nia Komandante Tránzitu Munisípiu Dili, Inspetór Xefe Domingos Sarmento Gama, deklara tanba sira falta Transporte hodi hala’o servisu.
“Bainhira akontese asidente ruma iha Dili, kada vés ami-nia atendimentu tarde, tanba Transporte Tránzitu Munisípiu Dili nian ida de’it, nune’e ami-nia Tránzitu Munisípiu Dili, iha membru 90 ital de’it, susar atu halo atendimentu ho lalais,” nia hateten iha knaar fatin Komandu PNTL Munisípiu Dili, Kaikoli, Sesta (22/11).
Tanba ne’e, nia husu ba média sira atu sai hanesan matan, tilun ba iha instituisaun Polisia Tránzitu, bainhira hetan asidente ruma iha Dili, atu informa mai iha parte Tránzitu nian, atu nune’e bele fó atendimentu lalais ba iha asidente refere.
“Dala-barak ita-nia sosiedade sira no reprezenta ita povu iha uma fukun, kada vés sira aprezenta no kestiona kona-ba Polisia nia atedimentu ba asidente sira, ami-nia atendimentu, tanba ami menus rekursu no membru Transporte, tanba ami iha Transporte ida de’it mak ativu,” nia dehan.
Nia esplika, kuandu mosu asidente ruma iha Dili, hanesan iha area Komoro, Bekora, Metinaru no fatin ne’ebé dook sira la bele atende, tanba Transporte ida de’it, serake membru Tránzitu Munisípiu Dili, maibé Transporte ativu ida, entaun susar atu atende lalais iha fatin dook.
“Dala-ruma asidente akontese oras hanesan iha fatin haat ka fatin lima, entaun ami tenke atende uluk ida no seluk ne’e tenke hein, hafoin ami atende uluk ida hotu lai mak ba fali seluk,” nia konta.
Nia haforsa liu tan, sira halo atendimentu ba asidente tarde ne’e, iha problema mak Transporte de’it.
“Ami Tránzitu Munisípiu Dili, fulan-fulan hatama reseita ho montante boot mak ba iha kofre Estadu, maibé ha’u hanoin kala instituisaun PNTL la aprezenta ou ita-nia Governu mak dala-ruma la haree hetan,” nia hakotu.
Aleinde Programa Manager A3 iha Belun, Romaldo Caetano, hatete kona-ba PNTL nia prezensa bainhira akontese asidente iha Dili, PNTL nia atendimentu trade ne’e sempre akontese.
“Maibé, ita-nia PNTL la’ós maromak kuandu akontese asidente iha ne’ebé sira tenke iha ne’ebá ona, iha nasaun ne’ebé de’it kuandu PNTL to’o ne’e, signifika katak tarde ona,” nia dehan.
Nia dehan, dala-ruma sira to’o tarde iha akontese asidente ne’e, maibé bele mós limitadu númeru PNTL no limitadu rekursu, ida ne’e mak ema hotu-hotu tenke kompriende.
“Ita la bele protesta de’it, ita atu protesta bele, maibé tenke fó mós solusaun, se situasaun akontese hanesan tuir ita-nia protesta ne’e, entaun saida mak presiza halo,” nia hakotu.
1,427 total views, 6 views today
