DILI—Organizasaun Naun Governmental Fundasaun Mahein (FM) husu ba Governu liuhosi Ministériu Interior (MI) atu hili figura ne’ebé mak merese lidera instituisaun Polisia Nasionál Timor-Leste (PNTL).
Diretór FM, Abel Amaral, hatete, bainhira Governu liuhosi Ministériu Interior hili feto atu lidera instituisaun PNTL ne’e vantajen di’ak ida tanba durante ne’e Governu seidauk fó fiar ba feto.
“Ministériu Interior atu hili feto ba lidera PNTL, FM hein ida ne’e vantajen ne’ebé di’ak no ida ne’e mak esperansa, tanba iha istória PNTL nian dezde ukun-an to’o agora ita seidauk fó fiar ba feto hodi lidera Instituisaun PNTL hanesan Komisária,” Abel haktuir ba Timor Post iha nia servisu fatin Bairru dos Grilos, Kinta (09/03).
“Kuandu Ministériu Interior nomeia feto ruma atu lidera Instituisaun PNTL ida ne’e kompeténsia tomak Ministériu Interior ninian, tanba ne’e ita haree sé mak hetan konfiansa husi Ministériu Interior,” nia hatutan.
Tanba ne’e, ligadu ho Komandante Jerál atuál sei remata ninia mandatu iha fulan oin, depois atu substitui Komandante Jerál ne’e normalmente tuir lei PNTL ninian ne’e katak, ne’e kompeténsia ministériu ne’ebé mak toma responsabilidade ba iha Instituisaun seguransa liuliu Ministériu Interior.
“Ba Fundasaun Mahein sé de’it mak assume kargu hanesan Komandante Jerál PNTL, importante mak ne’e, hili figura ne’ebé mak merese duni atu lidera Instituisaun PNTL, ida seluk mak figura ne’ebé husi komité jerál PNTL tenke ema ne’ebé mak integridade ne’e tenke di’ak,” Abel hateten.
Tuir nia, atuál komisáriu PNTL ne’e seidauk hasoru sansaun dixiplinár ruma ka seidauk komete asaun dixiplinár ruma ne’ebé mak durante ne’e hala’o knaar tomak iha Instituisaun PNTL.
Nia dehan, Komisáriu PNTL ne’ebé mak mai ne’e tenke hatene di’ak, hatene jere Instituisaun PNTL ho ninia Departamentu sira hotu, atu nune’e komandante PNTL ne’e bele sai profisionál liután.
“Ita rekomenda ba MI hodi hili kandidatu Komisáriu ida ne’ebé mak jeitu ba lideransa ba Instituisaun PNTL nian, ne’e tenke ema ne’ebé loyal ba Instituisaun, ba Lei, Ministériu Interior mais tenke ema ne’ebé integridade tenke di’ak, ema ne’e tenke di’ak no moos,” Abel akresenta.
984 total views, 9 views today
